डडेल्धुरा –डडेल्धुरा जिल्ला सदरमुकाम क्षेत्रको सडक विस्तारका लागि सडक क्षेत्रमा पर्ने संरचना भत्काउन सुरु गरिएको छ । अमरगढी नगरपालिकाले सडक क्षेत्रमा पर्ने संरचना हटाउन आजदेखि डोजर चलाएको हो ।
घरधनीले मुआब्जा पाएको महिनौं पुगे पनि सडक क्षेत्रमा पर्ने संरचना भत्काउन अटेरी गरेपछि अमरगढी नगरपालिकाले आजदेखि डोजर चलाएको नगरपालिकाको वडा नम्बर ५ का अध्यक्ष टंकबहादुर क्षेत्रीले बताए ।
सदरमुकामको बागबजारदेखि रानीधारासम्मका घर तथा जग्गाको सम्पूर्ण मुआब्जा वितरण भइसकेको छ । सडक डिभिजन कार्यालय डोटीका अनुसार मुआब्जा वितरण गरेर महाकाली राजमार्गको नाममा लालपूर्जा पनि आइसकेको छ ।
तर मुआब्जाको सम्पूर्ण रकम पाएका घरधनीले पनि संरचना भत्काउन अटेरी गरेपछि सडक निर्माणको प्रक्रिया अगाडि बढाउन ढिलाई भइरहेको छ । घरधनीहरुले संरचना भत्काउन अटेरी गरेपछि नगरपालिकाले डोजर चलाएको हो ।
