दार्चुला – दार्चुलाको खलङ्गामा रहेको भारतीय सीमा पुल खुल्ने समय एक घण्टा छोट्याइएको छ ।
भारतसँग सीमा जोडिएको महाकाली नगरपालिका वडा–४ खलङ्गामा रहेको झोलुङ्गे पुल खुल्ने समय हेरफेर गरिएको जिल्ला प्रशासन कार्यालय दार्चुलाले जनाएको छ । प्रशासन कार्यालय दार्चुलाका अनुसार आजदेखि बिहान ६ बजे खुलेर बेलुका ६ बजे बन्द हुने प्रमुख जिल्ला अधिकारी किरण जोशीले जानकारी दिइन् ।
यसअघि बिहान ६ बजे खुलेर बेलुकी ७ बजे बन्द हुँदै आएको सीमा पुल अब एक घण्टा छिटो बन्द हुने उनले बताइन् । दिनहरु छोटा भएकाले पुल खुल्ने समय पनि एक घण्टा छोट्याइएको बताइएको छ ।
ग्रीष्मकालीन समयमा यो नाका बिहान ६ बजे खुल्ने र बेलुका ७ बजे बन्द हुने गरेको छ ।
शीतकालीन समयमा छिट्टै अँध्यारो हुने भएकाले पनि नाका बन्द हुने समयमा हेरफेर गरिएको प्रमुख जिल्ला अधिकारी जोशीको भनाइ छ ।
सीमा पुल खुल्ने र बन्द हुने समय हेरफेरका बिषयमा यसअघिको सीमा समन्वय समितिको बैठकमा सहमति भएको थियो । सोही सहमति अनुसार सीमा पुल खुल्ने र बन्द हुने समयमा हेरफेर गरिएको प्रमुख जिल्ला अधिकारी जोशीले बताइन् ।
