कैलाली –इजरायलमा मारिएका विद्यार्थीका परिवारलाई सुदूरपश्चिम प्रदेश सरकारले दुई लाखका दरले आर्थिक सहयोग गरेको छ ।
प्रदेश सरकारले मृतकका परिवारलाई यसअघि घोषणा गरेको रकम मंगलबार हस्तान्तरण गरेको हो । टीकापुरमा आयोजना गरिएको कार्यक्रममा प्रदेश सरकारका आन्तरिक मामिला तथा कानुनमन्त्री शिवराज भट्टले मृतकका परिवारलाई सहयोग रकम हस्तान्तरण गरेका हुन् ।
सुदूरपश्चिमका मुख्यमन्त्री कमलबहादुर शाह र नेपालका लागि इजरायलका राजदुत हनन गोडेर गोल्डवेरगरको उपस्थितीमा मन्त्री भट्टले ७ जना मृतकका परिवारलाई चेक हस्तान्तरण गरेका थिए ।
गएको असोज २० गते इजरायलमा हमासले गरेको आक्रमणमा परी १० जनाको मृत्यु भएको थियो । ती मध्ये सात जना सुदूरपश्चिम प्रदेशका विद्यार्थी रहेका थिए ।
लर्न एण्ड अर्न कार्यक्रम अन्तरगत सुदुरपश्चिम विश्वविद्यालयबाट गएका १० जनाको हमासको आक्रमणमा परी मृत्यु भएको थियो । हमासले अपहरण गरेका भनिएका विपीन जोशीको अवस्था भने अझै अज्ञात रहेको छ ।
