बैतडी –बैतडी प्रहरीले लागू औषधविरुद्धको महाअभियान सञ्चालन गरिरहेको छ । लागू औषध दुव्र्यसनका कारण किशोरावस्थाका मानिस समेत फसीरहेकाले विद्यालय केन्द्रित कार्यक्रम सञ्चालनमा ल्याइएको जिल्ला प्रहरी कार्यालयका प्रमुख प्रहरी नायब उपरीक्षक दिपक गिरीले बताए ।
लागू औषधको प्रयोगले मानिसको जीवनमा पार्ने असर र कानुनी व्यवस्थाका बिषयमा विद्यार्थीहरुलाई जानकारी दिने गरिएको उनले बताए । विद्यालय उमेरका किशोरकिशोरीहरुमार्फत लागू औषध नियन्त्रणको प्रयास भइरहेको प्रहरी नायब उपरीक्षक गिरीले बताए । उनले भने ‘हामीले मातहतका प्रहरीचौकीबाट जिल्लाभरीका विद्यालयहरुमा सचेतनामूलक कार्यक्रम सञ्चालन गरिरहेका छौं । लागू औषधको दुव्र्यसनले पार्ने असरका बिषयमा विद्यार्थीहरुलाई जानकारी दिने गरेका छौं ।’
जिल्लाका १० ओटै स्थानीय तहमा रहेका विद्यालयहरुमा सचेतनामूलक कार्यक्रम सञ्चालन भइरहेका प्रहरी नायब उपरीक्षक गिरीले जानकारी दिए ।
चालु आर्थिक बर्षको अहिलेसम्म जिल्लाभरीका १ सय ५० विद्यालयमा कार्यक्रम सञ्चालन गरिसकिएको जिल्ला प्रहरी कार्यालयका प्रवक्ता प्रहरी निरीक्षक नन्दराज जोशीले जानकारी दिए । विद्यालयका साथै समुदायमा पनि जनचेतनामूलक कार्यक्रम सञ्चालन गर्ने गरिएको उनले बताए । चालु आर्थिक बर्षको साउनदेखि अहिले समुदायस्तरमा ४ सय ठाउँमा कार्यक्रम सञ्चालन भएका उनले बताए ।
प्रहरीले लागू औषध नियन्त्रणका साथै अन्य आपराधिक क्रियाकलाप न्यूनीकरणका लागि पनि कार्यक्रम सञ्चालन गरिरहेको प्रहरी निरीक्षक जोशीले जानकारी दिए । चालु आर्थिक बर्षको अहिले सम्म २७ हजार बढी नागरिकलाई विभिन्न बिषयमा जानकारी दिइसकेको प्रहरीको तथ्यांक छ । उनले भने ‘हामीले जिल्लाभरी अभियान सञ्चालन गरेका छौं । समाजमा हुने विभिन्न खालका अपराधको न्यूनीकरणका लागि समुदायकै साथ खोजेका छौं । त्यसैले हामीले विद्यालय र समुदायमा कार्यक्रम सञ्चालन गर्ने गरेका छौं ।’
लागू औषध नियन्त्रणका लागि सीमा नाकामा समेत कडाइ गरिएको प्रहरी निरीक्षक जोशीले बताए । मातहतका प्रहरीचौकीलाई लागू औषध नियन्त्रणका लागि कडाइका लाग्न निर्देशन दिइएको उनले बताए ।
लागू औषधको दुव्र्यसनले परिवारमात्रै नभएर समाजमा समेत असर पारिरहेकाले यसको नियन्त्रणमा अभिभावकहरुले पनि ध्यान दिनुपर्ने प्रहरी निरीक्षक जोशीले बताए ।
