बैतडी - बैतडीको पुर्चौडीमा अलपत्र मोटरेबल पुलको निर्माण कार्य सुरु भएको छ । विगत ४ वर्ष देखि अलपत्र मोटरेबल पुल निर्माणको काम सुचारु भएको हो । पुर्चौडी नगरपालिका १ खडिखेत नजिकैको जमाडी खोलामा निर्माण भइरहेको पुलमा अहिले धमाधम काम भैरहेको पुर्चौडी नगरपालिकाका सूचना अधिकारी प्रविन धानुकले जानकारी दिए ।
यो पुलको आर्थिक वर्ष २०७६÷७७ मा जगदम्बा कन्सट्रक्सनले निर्माणको जिम्मा पाएको थियो । संघीय सशर्त अनुदान अन्तर्गत ४ करोड ७० लाखको लागतमा पूर्वाधार विकास कार्यालय बैतडीले हेर्ने गरि निर्माण भइरहेको पुल अहिले सम्म निर्माण सम्पन्न हुन सकेको छैन् ।
निर्माण सामग्री अभावले रोकिएको पुल निर्माणको काम अहिले सुचारु भएको सूचना अधिकारी धानुकले बताए । एप्रोच रोडको निर्माण कार्य भएर दुवैतिर बेस निर्माण भएको पुलमा बाँकि काम अहिले सञ्चालन भएको छ । आवश्यक निर्माण सामग्री भारतबाट मगाउनु पर्ने भएकाले बिलम्व भएको पुलमा अहिले तिब्र गतिमा काम भैरहेको पूर्वाधार विकास कार्यालय बैतडीका इन्जिनियर नरेश भुलले बताए ।
अहिले निर्माण सामग्री पुगेपछि काम सुचारु भएको उनले बताए । जेड १५ भित्र निर्माण कार्य सक्ने गरि काम भैरहेको पूर्वाधार विकास कार्यालय बैतडीका इन्जिनियर भुलले बताए ।
सगुन खबरले पुल निर्माण अलपत्र परेको कुरा पटकपटक उठाएर सम्बन्धित निकायको ध्यानाकर्षण गराएको थियो ।
सम्बन्धित समाचार http://बैतडीको पुर्चौडीमा झण्डै पाँच करोडको पुल ३ वर्षदेखि अलपत्र https://www.sagunkhabar.com/detail/7979
