![अछाममा १६ वर्षीया किशोरीमाथि सामूहिक करणी](https://www.sagunkhabar.com/uploads/posts/minor-rape1688729407.jpg)
अछाम –अछाममा छाउगोठमा बसेकी एक किशोरीमाथि जवरजस्ती करणी भएको छ । जिल्लाको पञ्चदेवल विनायक नगरपालिकामा १६ वर्षीया किशोरीमाथि सोमवार राति सामूहिक करणी भएको हो ।
किशोरीमाथि करणी गरेको आरोपमा प्रहरीले एक स्थानीय १७ वर्षीय किशोरलाई पक्राउ गरेको छ । मामाघरमा बस्दै आएकी १६ वर्षीया किशोरी मामाघरको नजिक रहेको छाउगोठमा मंगलवार बिहान अचेत अवस्थामा फेला परेकी थिइन । उनलाई अचेत अवस्थामा देखेपछि मंगलवार बिहान स्थानीय एक किशोरीले प्रहरीलाई खबर गरेकी थिइन् ।
स्थानीय किशोरीले जानकारी दिएलगत्तै इलाका प्रहरी कार्यालयबाट खटिएको प्रहरी टोली र पञ्चदेवल विनायक नगरपालिकाका नगरप्रमुखलगायतले उनको उद्धार गरेर जिल्ला अस्पताल अछाम पठाएको थियो । जिल्ला अस्पताल अछाममा गरिएको स्वास्थ्य परीक्षणमा उनी करणी भएको पुष्टि भएको हो ।
अस्पतालमा उपचार पश्चात् होसमा आएकी ती किशोरीले आफू माथि करणी गरेको प्रहरीलाई बताएकी छन् । उनले स्थानीय १७ वर्षीय किशोरलगायत तीन–चार जनाले जवरजस्ती करणी गरेको बताएकी छन् । घटनाबारे थप अनुसन्धान भइरहेको जिल्ला प्रहरी कार्यालय अछामले जनाएको छ ।