बैतडी–बैतडीमा समयमा विद्युत महसुल नबुझाउने ग्राहकको लाइन काट्न थालिएको छ । मिटिर रिडिङ गरेको ६० दिनभित्र विद्युत महसुल नबुझाउनेको ग्राहकको बुधबारदेखि लाइन काट्न शुरु गरिएको नेपाल विद्युत प्राधिकरण बैतडी वितरण केन्द्रका प्रमुख जनार्दन पौडेलले बताए ।
हिजो (बुधबार) समयमा महसुल नबुझाउने २१ ग्राहकको लाइन काटिएको पौडेलले बताए । उनीहरुबाट १ लाख २६ हजार ४३ रुपैयाँ महसुल उठाउन बाँकी रहेको उनले बताए ।
बैतडीमा समयमा विद्युत महसुल नबुझाउने ७ हजार २७८ ग्राहकबाट १ करोड ८ हजार ३९२ रुपैयाँ महसुल उठाउन बाँकी रहेको नेपाल विद्युत प्राधिकरण बैतडी वितरण केन्द्रले जनाएको छ ।
विद्युत मिटर रिडिङ गरेको ६० दिनभित्र विद्युत महसुल बुझाइसक्नुपर्ने भएपनि ७ हजार २७८ ग्राहकले समयमा विद्युत महसुल नबुझाएको नेपाल विद्युत प्राधिकरण बैतडी वितरण केन्द्रका प्रमुख पौडेलले बताए ।
समयमा विद्युत महसुल नबुझाउनेको लाइन काट्ने कार्य शुरु भइसकेको र महसुल नबुझाउने सबैको लाइन काटिने पौडेलले बताए । नेपाल विद्युत प्राधिकरणको केन्द्रीय नीति अनुसार बुधबारदेखि समयमा महसुल नबुझाउनको लाइन काट्ने कार्य शुरु भएको उनले बताए ।
गत बर्ष समयमा विद्युत महसुल नबुझाउने बैतडीका ६ सय ९२ ग्राहकको लाइन काटेर ५६ लाख ३४ हजार ५८३ रुपैयाँ राजस्व संकलन गरिएको थियो । ९३ ओटा सरकारी कार्यालय, ३ ओटा पार्टी कार्यालय र अन्य ५ सय ९६ ग्राहकको लाइन काटिएको थियो ।
लाइन काटिएका मध्ये महसुल बुझाउने ४ सय ९९ ग्राहकको लाइन फेरि जोडिएको छ भने लाइन काटेर पनि महसुल नबुझाउनेहरुको लाइन जोड्न बाँकी रहेको उनले बताए ।
बैतडीमा २४ हजार ५६५ घरधुरीमा विद्युतको राष्ट्रिय प्रशारण पुगीसकेको छ । चालु आर्थिक बर्षमा जिल्लाका ८० प्रतिशत घरधुरीमा विद्युतको पहुँच पुर्याउने लक्ष्य रहेको पौडेलले बताए ।
विद्युत महसुल समयमा नबुझाउँदा ग्राहकले जरीवाना समेत तिर्नुपर्ने भएकाले समयमै विद्युत महसुल बुझाउन विद्युत प्राधिकरण बैतडी वितरण केन्द्रले आग्रह गरेको छ ।
