बैतडी–संघीय मामिला तथा सामान्य प्रशासन मन्त्रालयले बैतडीका तीनसहित एक सय पालिकामा नयाँ प्रमुख प्रशासकीय अधिकृत खटाएको छ ।
मन्त्रालयले प्रमुख प्रशासकीय अधिकृत रिक्त रहेका विभिन्न सय गाउँपालिकाहरुमा बुधवार सय जना शाखा अधिकृतहरुलाई पदस्थापन गरेको हो ।
स्टाफ कलेजको ६ महिना तालिम सकेका १ सय अधिकृतलाई विभिन्न गाउँपालिकामा खटाइएको हो ।
बैतडीका सुर्नया गाउँपालिका, शिवनाथ गाउँपालिका र पञ्चेश्वर गाउँपालिकामा नयाँ प्रमुख प्रशासकीय अधिकृत खटाएको छ ।
सुर्नया गाउँपालिकामा ज्योतीकुमारी बोहरालाई खटाइएको छ भने शिवनाथ गाउँपालिकामा सरोज पाण्डेयलाई खटाइएको छ ।यस्तै पञ्चेश्वर गाउँपालिकामा महेश पार्कीलाई प्रमुख प्रशासकीय अधिकृतको रुपमा खटाइएको छ ।
सुर्नया गाउँपालिकाका प्रमुख प्रशासकीय अधिकृत हर्षबहादुर रोकाको सरुवा भएपछि गाउँपालिका प्रमुख प्रशासकीय अधिकृत विहिन बनेको थियो । मन्त्रालयले बोहरालाई खटाएसंगै पालिकाले नयाँ प्रमुख प्रशासकीय अधिकृत पाएको छ ।
शिवनाथ गाउँपालिकामा स्वास्थ्य शाखा प्रमुख नरेन्द्रसिंह महताले प्रमुख प्रशासकीय अधिकृतको रुपमा काम गर्दै आएका छन् भने पञ्चेश्वर गाउँपालिकामा स्थानीय तर्फबाट अधिकृत कृष्णबहादुर बोहरा काम गर्दै आएका छन् ।
ती दुई गाउँपालिकामा पनि मन्त्रालयले नयाँ प्रमुख प्रशासकीय अधिकृत खटाएको हो ।
