बैतडी–लगातारको बर्षाका कारण खसेको पहिरोले दशरथचन्द राजमार्ग र महाकाली लोकमार्ग अवरुद्ध भएका छन् ।
दशरथचन्द राजमार्ग अन्तर्गत बैतडीको दशरथचन्द नगरपालिका १ गुरुखोलामा पहिरो खस्दा सडक अवरुद्ध भएको जिल्ला प्रहरी कार्यालय बैतडीका प्रवक्ता प्रहरी निरीक्षक बलराम पाण्डेयले जानकारी दिए । उक्त सडक अवरुद्ध हुँदा बैतडी सदरमुकामका लागि छुटेका सवारी साधन र सदरमुकामबाट छुटेका सवारी साधन बीचबाटोमै रोकिएका छन् ।
अवरुद्ध सडक खुलाउने प्रयास भइरहेको प्रहरी निरीक्षक पाण्डेयले जानकारी दिए ।
यस्तै महाकाली लोकमार्ग अन्तर्गत बैतडीको दोगडाकेदार गाउँपालिका ६ सल्सेना, दोगडाकेदार गाउँपालिका–४ सिल्लेकमा पहिरो खस्दा सडक अवरुद्ध भएको छ । अवरुद्ध सडक खुलाउने प्रयास भइरहेको प्रहरी निरीक्षक पाण्डेयले बताए ।
महाकाली लोकमार्ग अवरुद्ध हुँदा बैतडीबाट दार्चुलातर्फ जाने, तराईबाट दार्चुलाका लागि छुटेका र दार्चुलाबाट बैतडीसहित तराईका जिल्लाका छुटेका सवारी साधन बीचबाटोमै रोकिएका छन् ।
