बैतडी –डोटीमा इभी भ्यान र मिनी ट्रक एकआपसमा ठोक्किँदा ८ जना घाइते भएका छन् ।
कैलालीको अत्तरीयाबाट बैतडीको पुर्चौंडीतर्फ आउँदै गरेको सु.प.प्र. ०१ ००१ ज ०५२० नम्बरको इभी भ्यान र धनगढीतर्फ जाँदै गरेको से १ ख १४०६ नम्बरको मिनी ट्रक सोमबार बिहान पौने ९ बजेतिर डोटीको बुडरमा एकआपसमा ठोक्किएका हुन् ।
भ्यान र मिनी ट्रक एकआपसमा ठोक्किँदा इभी भ्यानमा सवार ८ जना सामान्य घाइते भएका हुन् । घाइते हुनेमा कैलालीको धनगढी उपमहानगरपालिका वडा न–४ का ३२ वर्षीय विकास बम, सोही ठाउँका क्रमशः १३ वर्षीय प्रिन्सीका बम, ९ वर्षीय कर्ण बम, ३४ वर्षीय निर्मला बम रहेका छन् ।
यस्तै घाइते हुनेमा बैतडीको पुर्चौडी नगरपालिका वडा न– १ बस्ने २९ वर्षीय द्रोपती बिष्ट, सोही ठाउँका ९ महिनाका रियान्स बम, ३९ वर्षीय दिवाकर बम र वडा नम्बर ३ बस्ने ६३ वर्षीय बबिता बम रहेका छन् ।
घाइतेमध्ये विकास बम, प्रिन्सीका बम, कर्ण बम, निर्मला बम र बैतडीका दिवाकर बमको धनगढीस्थित मायामेट्रो अस्पतालमा उपचार भइरहेको छ । बाँकी ३ जनाको स्वास्थ्यचौकी बुडरमा उपचार भएको प्रहरीले जनाएको छ ।
दशैँको पूजाका लागि बैतडी आउँदै गरेका मानिसहरु घाइते भएका हुन् । ठक्करका कारण इभी भ्यानमा बढी क्षति भएको प्रहरीले जनाएको छ ।
दुवै जना चालकलाई नियन्त्रणमा लिएर घटनाबारे थप अनुसन्धान भइरहेको जिल्ला प्रहरी कार्यालय डोटीले जनाएको छ ।
