अछाम –कैलालीबाट अछाम आउँदै गरेको फोर्स गाडी दुर्घटना भएको छ । कैलालीबाट अछामतर्फ आउँदै गरेको सुदूरपश्चिम प्रदेश ०१००१ख३०४६ नम्बरको फोर्स गाडी अचानक भित्तामा ठोकिँदा १३ जना घाइते भएका जिल्ला प्रहरी कार्यालय अछामका प्रमुख प्रहरी नायब उपरीक्षक ईश्वरीप्रसाद भण्डारीले बताए । उक्त गाडीमा २६ जना सवार रहेको बताइएको छ ।
मंगलबार साँझ कर्णाली राजमार्गमा भएको दुर्घटनामा परी घाईते भएका मध्ये ८ जनाको सुर्खेतमा उपचार भइरहेको छ भने ५ जना घाइतेको स्थानीय मेडिकलमा उपचार गरिएको छ ।
घाईते मध्ये ३ जनाको अवस्था गम्भीर रहेको छ । दैलेख आठबिस नगरपालिका–४ का २५ वर्षीय रिदम शाही, अछामको ढकारी गाउँपालिका–१२ बस्ने ५० वर्षीया पार्वती शाही र सोही नगरपालिका–८ की ४ वर्षीया नेहा खड्काको अवस्था गम्भीर रहेको प्रहरी नायब उपरीक्षक भण्डारीले बताए ।
घटनाका बिषयमा प्रहरीले थप अनुसन्धान भइरहेको जिल्ला प्रहरी कार्यालय अछामले जनाएको छ ।
