बैतडी–दशौं बृहत राष्ट्रिय खेलकुद प्रतियोगिताको बैतडी जिल्लास्तरीय छनौट प्रतियोगिताको उद्घाटन गरिएको छ । सदरमुकाम गढीस्थित टुँडिखेलमा आज एक समारोहकाबीच छनौठ खेलको उद्घाटन गरिएको बैतडी जिल्ला खेलकुद समितिका कार्यालय प्रमुख तर्कराज जोशीले जानकारी दिए ।
उद्घाटन समारोहमा दशरथचन्द नगरपालिकाका उपप्रमुख कौशिला चन्द,पाटन नगरपालिकाका उपप्रमुख कमलसिंह बोहरा,प्रमुख जिल्ला अधिकारी भीमकान्त शर्मा, जिल्ला खेलकुद समितिका अध्यक्ष चमनकुमार भण्डारीलगायतको उपस्थिति रहेको थियो ।
छनौट खेलको उद्दघाटन पछि विभिन्न विधाका प्रतियोगिता सम्पन्न भएका छन् । टेबुल टेनिस,बुद्धिचाल,भारत्तोलन (महिला,पुरूष),कराँते,तेक्वान्दो आइटीएफ,तेक्वान्दो,ब्याडमिन्टन (महिला,पुरूष)तर्फका छनौट खेल सम्पन्न भएका छन् ।
यस्तै भोलि उसु,फुल कराँते,कराते (महिला,पुरूष) सदरमुकाममा, कात्तिक ६ गते महिला, पुरूष भलिबल देहिमाडौंमा हुने भएको छ ।
यसका साथै कात्तिक ७ गते देहिमाडौंमा एथ्लेटिक्स(महिला,पुरूष), कात्तिक ८ गते पाटनमा कबड्डी (महिला,पुरूष) र पुरूष फुटबल, पुरूष बक्सिङ हुनेछ ।
कात्तिक ९ गते पाटनमै महिला र पुरूष क्रिकेट छनौट प्रतियोगिता हुनेछ ।
प्रतियोगिताका लागि एकहजार ३५ खेलाडीले आफ्नो नाम दर्ता गराएका छन् । जसमध्ये सबै खेलका गरेर २८१ खेलाडी छनौट हुनेछन् ।
जिल्लाबाट छनौट भएका खेलाडीहरुलाई प्रदेशस्तरीय छनौट खेलमा सहभागी गराइने जोशीले बताए ।
राष्ट्रिय खेलकुद परिषद्को आयोजनामा दशौं बृहत राष्ट्रिय खेलकुद प्रतियोगिता मंसिर २ गतेदेखि कर्णाली प्रदेशमा हुने तय भएको छ ।
