बैतडी–बैतडीको पाटनमा जारी चौथो संस्करणको पाटन प्रिमियर लिगको छैठौं दिन आज पनि दुई खेल सम्पन्न भएका छन् । जसमा टिम कोइनोडा गुरुखोला लायन्स र पञ्चेश्वर गाउँपालिका विजयी भएका छन् ।
पहिलो खेलमा गुरुखोलाले सागर स्पोट्स क्लब,मेलौलीलाई ८ विकेट हरायो । जितका लागि पाएको ६९ रनको लक्ष्य गुरुखोलाले ४ दशमलब ५ ओभरमा २ विकेटको क्षतिमा भेट्टायो । जसमा लोकेश चन्दले अविजित ४९ रनको योगदान गरे । सागर स्पोट्सका लागि आकाश विष्टले १ विकेट लिए ।
यसअघि श्रीकृष्ण मावि पाटनको खेलमैदानमा टस जितेर पहिला ब्याटिङ गर्ने निर्णय गरेको सागर स्पोट्स १३ दशमलब ४ ओभरमा ६८ रनमा समेटियो । जसमा धु्रव नायकले १५ रनबनाउनुबाहेक अन्यले दोहोरो अंकमा रन जोड्न सकेनन् ।
गुरुखोलाका लागि विकास आग्रीले ३ विकेट लिए । म्यान अफ द म्याच समेत चुनिएका विकासले ३ ओभर बलिंग गर्दै २ मेडन राखेर ४ रन खर्चिदै ३ विकेक हात पारेका हुन् ।
आजै सम्पन्न अर्को खेलमा पञ्चेश्वरले पाटन स्टार क्रिकेट क्लबलाई ८६ रनले हरायो । टस हारेर पहिला ब्याटिङ गरेको पञ्चेश्वरले निर्धारित २० ओभरमा ८ विकेटको क्षतिमा २३३ रन बनायो । जसमा कप्तान अभिशेक पालले १४२ रनको सतकीय पारी खेले । स्टारका लागि धिरेन्द्र ऐरीले ३ तथा पञ्कज चन्दले २ विकेट लिए ।
जितका लागि २३४ रनको विशाल लक्ष्य पछ्याएको स्टारले निर्धारित २० ओभरमा ६ विकेट गुमाएर १४७ रन मात्रै बनाउन सक्यो । जसमा सुदर्शन भट्टले ४४, दिनेश जोशी ३० र आयुश ठगुन्नाले २७ रनको योगदान गरेपनि टोलीलाई जिताउन सकेनन् । पञ्चेश्वरका जयराम भट्टले ३ र विरेन्द्र नाथले २ विकेट हात पारे ।
अभिशेक प्लेयर अफ द म्याच चुनिएका स्कोरर दीपेन्द्रबहादुर बोहराले जानकारी दिए ।
पाटन क्रिकेट क्लबको आयोजनामा असोज ३० गतेदेखि सञ्चालन भएको प्रतियोगितामा १७ टोलीको सहभागीता रहेको छ । सहभागी टोलीलाई छ समूहमा विभाजन गरेर खेल भइरहेका छन् ।
प्रतियोगिताको प्रथम पुरस्कार १ लाख २३ हजार ४५६ नगदसहित ट्रफी, मेडल, र प्रमाणपत्र प्रदान गरिने क्लबका अध्यक्ष किरन चन्दले बताए ।
यस्तै द्वितीय पुरस्कार ५६ हजार ७८९ नगदसहित ट्रफी, मेडल, र प्रमाणपत्र प्रदान गरिने पाटन क्रिकेट क्लबले जनाएको छ ।
यसैगरी म्यान अफ द सिरज वाफत १२ हजार ३४५ नगदसहित ट्रफी, मेडल, र प्रमाणपत्र प्रदान गरिने छ । बेस्ट बलर र ब्याट्सम्यानलाई पनि समान ६ हजार ७८९ नगदसहित ट्रफी, मेडल, र प्रमाणपत्र प्रदान गरिने छ ।
