बैतडी–बैतडीमा कोभिड –१९ विरुद्धको खोप अभियान आजदेखि शुरु भएको छ ।
बैतडीका दुईओटा पालिकामा आजदेखि खोप अभियान शुरु भएको स्वास्थ्य कार्यालय बैतडीले जनाएको छ । जिल्लाको पुर्चौंडी नगरपालिका र दोगडाकेदार गाउँपालिकामा आजदेखि खोप अभियान सञ्चालन भएको हो । पुर्चौंडी नगरपालिकामा यही कार्तिक १३ गतेसम्म अभियान सञ्चालन हुनेछ भने दोगडाकेदार गाउँपालिकामा यही कार्तिक १४ गतेसम्म अभियान सञ्चालन हुनेछ ।
पुर्चौंडी नगरपालिकाका विभिन्न स्वास्थ्य संस्थाहरु र खोपकेन्द्रमार्फत कोभिड–१९ विरुद्धको फाइजर खोप दिने कार्य शुरु भएको नगरपालिकाका स्वास्थ्य शाखा प्रमुख सुरेन्द्र अवस्थीले बताए ।
कोभिड १९ भाइरसले आनुवांशिक स्वरुप परिवर्तन गरेर फैलिरहेको हुँदा स्वास्थ्य मन्त्रालयको नीति अनुसार जिल्लामा पनि खोप अभियान सञ्चालन भएको स्वास्थ्य कार्यालय बैतडीका खोप सुपरभाइजर निरीक्षक हरिश भट्टले जानकारी दिए ।
बैतडीमा आजदेखि यही कार्तिक २८ गतेसम्म कोभिड विरुद्धको फाइजर खोप दिने तालिका रहेको खोप सुपरभाइजर निरीक्षक भट्टले जानकारी दिए ।
यो भन्दा पहिला कोरोना विरुद्धको खोप नलगाएका १२ बर्षभन्दा माथिका सबै नागरिक र कोरोना खोप लगाएको १ बर्ष पूरा भएका १२ बर्षमाथिका सबै नागरिकलाई कोभिड –१९ विरुद्धको खोप दिइने स्वास्थ्य कार्यालय बैतडीका प्रमुख तीर्थराज भट्टले जानकारी दिए । गर्भवती महिलाहरुको हकमा तीन महिना पूरा भएकाहरुलाई मात्रै खोप दिइने उनले बताए ।
खोप अभियान सञ्चालनका लागि जिल्लाभरी १ सय ४८ ओटा खोपकेन्द्र तोकिएका छन् । अभियानका लागि एक खोप केन्द्रमा एकजना स्वास्थ्यकर्मी र दुई जना स्वयंसेवक खटिने स्वास्थ्य प्रमुख भट्टले जानकारी दिए ।
जिल्लाको मेलौली नगरपालिका, सुर्नया गाउँपालिका र पञ्चेश्वर गाउँपालिकामा कार्तिक ११ र १२ गते खोप अभियान सञ्चालन हुनेछ ।
५ ओटा पालिकामा तिहारपछि खोप अभियान सञ्चालन गरिनेछ । पाटन नगरपालिका, शिवनाथ गाउँपालिका, डिलाशैनी गाउँपालिका र सिगास गाउँपालिकामा कार्तिक २६ र २७ गते खोप अभियान सञ्चालन हुने तय भएको छ । जिल्लाको दशरथचन्द नगरपालिकामा कार्तिक २७ र २८ गते खोप अभियान सञ्चालन हुने स्वास्थ्य प्रमुख भट्टले बताए ।
जिल्लामा खोप अभियानका १४ हजार ४ सय डोज खोप रहेको छ । कोभिडबाट बच्नका लागि एकमात्रै उपाय खोप भएकाले अभियान सञ्चालन भएका बेला नजिकका खोपकेन्द्रमा गएर खोप लगाउन आग्रह समेत गरिएको छ ।
