डडेल्धुरा –डडेल्धुरामा जिप दुर्घटना हुँदा दुई जनाको मृत्यु भएको छ भने ९ जना घाइते भएका छन् । मृतक दुवै जना महिला रहेका छन् । मृतक र घाइतेको पहिचान खुल्न बाँकी रहेको प्रहरीले जनाएको छ ।
जिल्लाको परशुराम नगरपालिका–९ स्थित दैजी–जोगबुढा सडकखण्डको नौलामा मंगलबार दिउँसो तीन बजेर ३ बजेर ५० मिनेट जिप दुर्घटना भएको हो ।
कञ्चनपुरको दैजीबाट डडेल्धुराको जागबुढा आउँदै गरेको लु १ ज ४५७९ नम्बरको जिप सडकबाट एक सय मिटर तल खसेको जिल्ला प्रहरी कार्यालय डडेल्धुराले जनाएको छ ।
जिपमा चालकसहित १२ जना सवार रहेको बुझिएको छ । घाइते ९ जनालाई एम्बुलेन्समार्फत थप उपचारका लागि कञ्चनपुर पठाइएको प्रहरीले जनाएको छ ।
जिप चालक डडेल्धुराको परशुराम नगरपालिका –११ एक्लेगडाका २४ बर्षीय प्रकाश कुँवरलाई प्रहरीले नियन्त्रणमा लिएको छ । चालक सकुशल रहेका छन् ।
घटनाका बिषयमा थप अनुसन्धान भइरहेको प्रहरीले जनाएको छ ।
