बैतडी –बैतडीमा पाटन भ्याली क्रिकेट क्लबले आयोजना गर्दै आएको उदयदेव प्रिमियर लिग (युपीएल)को ट्रफी अनावरण गरिएको छ ।
शनिबार पाटन नगरपालिका–६ स्थित उदयदेव मन्दिरको प्रांगणमा एक कार्यक्रमको आयोजना गरेर ट्रफी अनावरण गरिएको पाटन भ्याली क्रिकेट क्लबका अध्यक्ष सन्तोष जोशीले बताए ।
जिल्ला खेलकुद विकास समिति बैतडीका अध्यक्ष चमनकुमार भण्डारी, पाटन नगरपालिका–४ का वडा अध्यक्ष दिपक बिष्ट लगायतका व्यक्तिहरुले संयुक्त रुपमा ट्रफी अनावरण गरेका हुन् ।
पाटन भ्याली क्रिकेट क्लबले गतबर्षदेखि उदयदेव प्रिमियर लिगको आयोजना गर्दै आएको छ । जिल्लामा रहेका धार्मिक तथा सांस्कृति क्षेत्रहरुको प्रचारप्रसारका साथै खेलकुद क्षेत्रको विकासका लागि प्रिमियर लिगको आयोजना गर्न लागेको जोशीले बताए ।
उदयदेव प्रिमियर लिग सञ्चालनको मिति भने तय हुन बाँकी रहेको छ । प्रिमियर लिगको पुरस्कार भने भोलि(आइतबार) घोषणा गर्ने तयारी भएको अध्यक्ष जोशीले बताए ।
