बैतडी –बैतडीको पाटनमा सञ्चालन हुने दोश्रो संस्करणको उदयदेव प्रिमियर लिग (युपीएल को पुरस्कार राशी घोषणा गरिएको छ । पाटन भ्याली क्रिकेट क्लबको आयोजनामा सञ्चालन हुने युपीएलको पुरस्कार राशी सोमाबार घोषणा गरिएको हो । 

शनिवार प्रतियोगिताको ट्रफी अनावरण गरिएको थियो । क्लबका अध्यक्ष सन्तोष जोशीले यो संस्करणमा प्रथम हुने टीमलाई १ लाख १ सय ११ रुपैयाँ नगदसहित ट्रफी, मेडल र प्रमाण प्रदान गरिने जानकारी दिए । यस्तै उपविजेता टोलीले ४५ हजार ५५ रुपैयाँ  नगदसहित ट्रफी मेडल र प्रमाणपत्र प्राप्त गर्ने जोशीले बताए । 

यस्तै म्यान अफ दि सिरिजलाई ८ हजार ८४८ रुपैयाँ, बेष्ट ब्याट्सम्यान तथा बेष्ट बलरलाई समान ५ हजार ५५५ रुपैयाँ र उदयमान खेलाडीलाई २ हजार ५२५ रुपैयाँ नगदसहित ट्रफी मेडल र प्रमाणपत्र प्रदान गरिने आयोजकले जनाएको छ । 

गत संस्करणमा पाटन नगरपालिका भित्रका टीमले मात्रै सहभागिता जनाउन पाउने गरि प्रतियोगिता सञ्चालन गरिएको भएपनि यो बर्ष भने जिल्लामा दर्ता भएका क्लब, संघ संस्था तथा स्थानीय तहहरुले सहभागी हुन पाउने पाटन भ्याली क्रिकेट क्लबका अध्यक्ष जोशीले जानकारी दिए ।

प्रतियोगिता आइसिसिको नियमानुसार सञ्चालन गरिने बताइएको छ । प्रत्येक टीममा जिल्ला बाहिरका तीन जना खेलाडी मात्रै सहभागी गराउन पाउने क्लबले जनाएको छ । प्रतियोगिता सञ्चालन हुने मिति केही दिनमा सार्वजनिक गरिने अध्यक्ष जोशीले बताए । 

युपीएलको प्रथम संस्करण विजेतालाई ३० हजार र उपविजेतालाई २० हजार नगदसहित ट्रफी, मेडल र प्रमाणपत्र प्रदान गरिएको थियो । आयोजक पाटन भ्याली क्रिकेट क्लबले गत बर्ष उपाधि जितेको थियो ।