बैतडी– बैतडीमा नेपाल रेडक्रस सोसाइटीले विपन्न परिवारलाई कम्बल वितरण गरेको छ ।
नेपाल रेडक्रस सोसाइटी शाखा बैतडीले उपलब्ध गराएको कम्बल उपशाखा शंकरपुरले वितरण गरेको हो ।
अति विपन्न १२ जनालाई रेडक्रसले कम्बल वितरण गरेको नेपाल रेडक्रस सोसाइटी उपशाखा शंकरपुरका उप–सचिव करुणाकर अवस्थीले बताए । शुक्रबार एक कार्यक्रमको आयोजना गरेर विपन्न परिवारलाई चिसोको समयमा कम्बल वितरण गरिएको हो ।
चिसोको समयमा विपन्न नागरिकहरुलाई केही सहयोग पुगोस् भन्ने उद्देश्यले कम्बल वितरण गरिएको नेपाल रेडक्रस सोसाइटी उपशाखा शंकरपुरकी उपसभापति सरस्वती अवस्थीले बताइन् ।
रेडक्रस मानव सेवामा समर्पित संस्था भएकाले विपन्न नागरिकहरुलाई बेला–बेलामा सहयोग गर्दै आएको नेपाल रेडक्रस सोसाइटी शाखा बैतडीका सभापति विष्णु अवस्थीले बताए । सामाजिक क्षेत्रमा क्रियाशील संस्था भएकाले सोसाइटी विभिन्न कामहरु गर्दै आएको उनले बताए ।
रेडक्रसले विभिन्न विपद्मा परेका नागरिकहरुलाई समेत सहयोग गर्दै आइरहेको छ । विपद् पूर्वतयारी, विपद्को समय र विपद् पश्चात समेत रेडक्रसले आफ्ना कार्यक्रमहरुलाई केन्द्रित गरेको सभापति अवस्थीले बताए ।
