बैतडी–बैतडीको डिलाशैनी गाउँपालिकामा सञ्चालन भएको अध्यक्ष कप खुल्ला भलिबल प्रतियोगिताको उपाधी नरेश पोल्ट्री फर्मको टीमले जितेको छ । बिहीबार भएको फाइनल खेलमा मठैराजको टीमलाई हराउँदै नरेश पोल्ट्री फर्मको टीम विजेता बनेको हो ।
जितसंग नरेश पोल्ट्री फर्मको टीमले नगद ४० हजार रुपैयाँसहित ट्रफी र प्रमाण पत्र पाएको छ । यस्तै प्रतियोगितामा मठैराजको टीम दोश्रो भएको छ । उसले नगद २५ हजार रुपैयाँसहित ट्रफी र प्रमाणपत्र हात पारेको छ ।
यस्तै प्रतियोगितामा तेश्रो भएको डिलाशैनी गाउँपालिका वडा नं ६ को टीमले नगद १५ हजार रुपैयाँसहित ट्रफी र प्रमाणपत्र हात पारेको छ ।
डिलाशैनी गाउँपालिका –५ स्थित हरिनगर खेलमैदानमा बुधबारदेखि शुरु भएको प्रतियोगिता बिहीबार सकिएको हो । उक्त प्रतियोगितामा ६ ओटा टीमको सहभागिता रहेको थियो ।
स्थानीयस्तरमा रहेका खेलाडीहरुको क्षमता अभिवृद्धिका लागि डिलाशैनी गाउँपालिकाले हरेक बर्ष अध्यक्ष कप खुल्ला भलिबल प्रतियोगिता गर्दै आएको छ । उक्त प्रतियोगितामा डिलाशैनी गाउँपालिकाभित्र खेलाडीहरुलाई मात्रै सहभागी गराइएको थियो ।
प्रतियोगिताले भलिबल खेलप्रति खेलाडीहरुको रुचि बढाउनुका साथै खेलाडीहरुको क्षमता अभिवृद्धिमा सहयोग गरेको डिलाशैनी गाउँपालिकाका अध्यक्ष सन्तोषप्रकाश जोशीले बताए ।
