बैतडी – अर्जुन ट्रफी राष्ट्रिय टी–२० क्रिकेट प्रतियोगितामा दशरथ चन्द एकेडेमी बैतडीले पहिलो जित हात पारेको छ । बैतडीले क्रिकेट एक्सेलेन्स सेन्टर काठमाण्डौलाई १६ रनले हरायो ।

बैतडीले दिएको १ सय ६१ रनको लक्ष्य पछ्याएको काठमाण्डौ १९ ओभर ४ बलमा १ सय ४४ रनमा अलआउट भयो । काठमाण्डौका राज शाहले नटआउट ३७, दीपेन्द्र रावतले ३२ रन बनाए । बैतडीका सलाहुद्दीन खानले ५, दिवान पुनले ३ विकेट लिए ।

यसअघि धनगढीको फाप्ला क्रिकेट मैदानमा टस जितेर ब्याटिङ गरेको बैतडीले २० ओभरमा ८ विकेट गुमाएर १ सय ६० रन बनायो । बैतडीका दिवान पुनले ४३, वसन्त खत्रीले ३२, अमर रौटेलाले नटआउट २९ रन बनाए । काठमाण्डौका दीपेन्द्र रावत र सूर्य तामाङले २÷२ विकेट लिए । यो जितसँगै बैतडी ३ खेलमा २ अङ्कसहित समूह ‘बी’ को तेस्रो स्थानमा छ । काठमाण्डौ उति नै खेलमा २ अङ्कसहित पुछारमा छ । भोलि लिग चरणको अन्तिम खेलपछि समूह ‘बी’ बाट सेमिफाइनल पुग्ने टोलीको टुङ्गो लाग्नेछ ।

अर्जुन ट्रफी क्रिकेटमा देशभरका ८ वटा क्लब सहभागी छन् ।

प्रतियोगिताको विजेताले १० लाख र उपविजेताले ५ लाख रुपैयाँ पुरस्कार पाउनेछन् । प्रतियोगिता आउँदो सोमवार माघ २८ गतेसम्म चल्नेछ ।