नेपाली युवा टोलीले भारतको दिल्ली १९ वर्षमुनिको टोलीलाई पहिलो अभ्यास खेलमा ५ विकेटले पराजित गर्दै शानदार सुरुआत गरेको छ। तीन खेलको ५० ओभरको अभ्यास सिरिजमा नेपालले १–० को अग्रता लिएको छ।

दिल्लीले दिएको ९६ रनको लक्ष्य नेपालले ३१ ओभरमै ५ विकेट गुमाएर पूरा गर्‍यो। नेपालका अमर मिश्रले २७ रन जोड्दा रोशन विश्वकर्माले नटआउट २५ रन बनाएर टोलीलाई जित दिलाए। दिल्लीका अमन चौधरीले २ विकेट लिए।

यसअघि, वीरगञ्जमा टस जितेर पहिले ब्याटिङ गरेको दिल्ली टोली २३ ओभर ३ बलमै ९५ रनमा अलआउट भयो। दिल्लीका सार्थक पलले टिमका लागि सर्वाधिक २९ रन बनाए। नेपालका सिबरिन श्रेष्ठ र अपराजित पौडेलले उत्कृष्ट बलिङ गर्दै समान ३–३ विकेट लिए।
 
पहिलो खेल जित्दै आत्मविश्वास बढाएको नेपाली युवा टोली दोस्रो अभ्यास खेल बिहीवार खेल्नेछ। नेपाली टोली सिरिज जित्ने लक्ष्यसहित मैदानमा उत्रिनेछ।