बैतडी-बैतडीको पाटन नगरपालिका ८ आलु पकेट क्षेत्रको रूपमा स्थापित हुँदै गएको छ। तर, यहाँका किसानहरू कोल्ड स्टोरको अभावमा सस्तो मूल्यमा उत्पादन बेच्न बाध्य भएका छन्।
सोमबार सुदूरपश्चिम प्रदेश सरकारका भूमि व्यवस्था तथा कृषि सहकारी मन्त्री वीरबहादुर थापा सहितको टोलीले पाटन नगरपालिका ८ मा सञ्चालित आलु पकेट क्षेत्रको अनुगमन गरेको छ। कृषि ज्ञान केन्द्र बैतडीका प्रमुख हरिदत्त जोशी र पाटन नगरपालिका ८ का वडा अध्यक्ष हरिश बिष्टसहितको टोलीले आलु उत्पादनको अवस्थाबारे जानकारी लिएको हो।
अनुगमनका क्रममा मन्त्री थापाले स्थानीय किसानहरूसँग छलफल गर्दै उनीहरूको समस्या सुने। किसानहरूले तरकारी संकलन केन्द्र र कोल्ड स्टोर सञ्चालनका लागि पहल गरिदिन माग गरे। कोल्ड स्टोर नहुँदा उत्पादन सस्तोमा बिक्री गर्नुपर्ने र बिउ खरिद गर्दा महँगो पर्ने समस्या किसानहरूले व्यक्त गरे।
मन्त्री थापाले किसानहरूको समस्या सुनेपछि आलु उत्पादनको बजारीकरण र कोल्ड स्टोर सञ्चालनका लागि सक्दो पहल गर्ने प्रतिबद्धता जनाए। अनुगमन टोलीले पाटन नगरपालिका ८ खोड्पेमा रहेको १० टन क्षमताको कोल्ड स्टोर पनि अवलोकन गरेको छ।
यो कोल्ड स्टोर कृषि ज्ञान केन्द्र बैतडीको १५ लाख अनुदान र दोगडाकेदार भुमिराज कोल्ड स्टोरको लगानीमा करिब ४५ लाख रुपैयाँ लागतमा निर्माण भएको थियो। तर, निर्माण भएको दुई वर्ष बितिसक्दा पनि सञ्चालनमा आउन नसक्दा किसानहरूको उत्पादनको उचित मूल्य पाउन कठिन भएको छ।
कोल्ड स्टोरका सञ्चालक ललितमोहन भट्ट सम्पर्कविहीन भएको र प्रदेश सरकार, कृषि ज्ञान केन्द्र तथा जिल्ला प्रशासनसमक्ष पटक(पटक माग गर्दा पनि समस्या समाधान नभएको वडा अध्यक्ष बिष्टले जानकारी दिए।
किसानहरूले आलु पकेट क्षेत्रलाई व्यवस्थित गर्न र कोल्ड स्टोर सञ्चालनमा ल्याउन प्रदेश सरकार र सम्बन्धित निकायलाई तुरुन्त पहल गर्न आग्रह गरेका छन्। मन्त्री थापाले समस्या समाधानका लागि सहजीकरण गर्ने प्रतिबद्धता व्यक्त गरेका छन्।
पाटनमा आलु उत्पादन बिस्तार हुँदै गए पनि बजारीकरण र भण्डारणको अभावले किसानहरू निराश छन्। सरकारले समयमै कोल्ड स्टोर सञ्चालनको पहल नगरेमा उत्पादनमा हतोत्साही हुने खतरा रहेको स्थानीयको भनाइ छ।
कृषि ज्ञान केन्द्र र प्रदेश सरकारबीच समन्वय गरी यस क्षेत्रमा कोल्ड स्टोर सञ्चालनको लागि ठोस कदम चाल्न आवश्यक देखिएको छ।
