बैतडी –नेपाली कांग्रेस बैतडीको बैठक सोमबार पाटनमा सम्पन्न भएको छ ।
जिल्ला सभापति चतुरबहादुर चन्दको अध्यक्षतामा भएको बैठकले यही चैत २५ गतेभित्र क्रियाशील सदस्यता नवीकरण गरिसक्नुपर्ने निर्णय गरेको नेपाली कांग्रेस बैतडीका सचिव प्रेमबहादुर चन्दले बताए ।
यस्तै पार्टीले अहिलेसम्म ३९ ओटा वडामा सम्मेलन सम्पन्न गरेको र बाँकी वडाहरुमा जेठ मसान्तसम्म सम्मेलन गरिसक्ने निर्णय गरेको छ ।
यस्तै जिल्ला प्रशिक्षण विभागले आगामी वैशाखदेखि तहगत रुपमा प्रशिक्षण कार्यक्रम सञ्चालन गर्ने निर्णय गरेको सचिव चन्दले बताए ।
बैठकले पार्टीबाट निर्वाचित भएका जनप्रतिनिधिहरुलाई कांग्रेसको विधान अनुसार समयमै लेबी तिर्न आग्रह गरेको छ । लेबी नतिर्नेहरुको क्रियाशील सदस्यता नवीकरण नगर्ने निर्णय भएको सचिव चन्दले बताए ।
बैठकमा जिल्ला कार्यसमितिका पदाधिकारी, जिल्ला कार्यसमितिका सदस्य, पार्टीका पालिका सभापति, क्षेत्रीय सभापति र पार्टीबाट निर्वाचित पालिकाका प्रमुख तथा उपप्रमुखहरुको सहभागिता रहेको थियो ।
