बैतडी–बैतडीको दशरथचन्द नगरपालिकाले आधारभूत तह कक्षा ८को परीक्षाफल प्रकाशित गरेको छ । चालु शैक्षिक सत्रमा सञ्चालन गरिएको नगरस्तरीय परीक्षाको परीक्षाफल प्रकाशन गरिएको दशरथचन्द नगरपालिकाका शिक्षा शाखा प्रमुख हरिशप्रकाश भट्टले जानकारी दिए ।
नगरपालिकाले सोमबार प्रकाशन गरेको नतिजा अनुसार परीक्षामा सहभागी भएका परीक्षार्थीमध्ये ५८.६० प्रतिशत विद्यार्थी उत्तीर्ण भएका छन् । उक्त परीक्षामा ४१.४० परीक्षार्थी अनुत्तीर्ण भएका शिक्षा शाखा प्रमुख भट्टले बताए ।
दशरथचन्द नगरपालिकाले गएको फागुन २६ गतेदेखि चैत ५ गतेसम्म सञ्चालन गरेको परीक्षामा ३४ विद्यालयका ७ सय ५१ जना परीक्षार्थीहरुको सहभागिता रहेको थियो । परीक्षामा सहभागी भएकामध्ये ४ सय जना विद्यार्थी उत्तीर्ण भएका छन् भने ३ सय ५१ जना परीक्षार्थी अनुत्तीर्ण भएका छन् ।
अनुत्तीर्ण भएका परीक्षार्थीहरुमध्ये बढीमा दुई बिषयमा ननग्रेड ल्याएका परीक्षार्थीहरुलाई स्तरवृद्धि परीक्षामा सहभागी गराइने शिक्षा शाखा प्रमुख भट्टले बताए । दशरथचन्द नगरपालिकामा १ सय ८७ जना परीक्षार्थीहरुले स्तरवृद्धि परीक्षामा सहभागिता जनाउने पाउनेछन् । त्यस्ता विद्यार्थीहरुले चैत मसान्तभित्र परीक्षा फारम भरिसक्नुपर्नेछ ।
कक्षा ८ को स्तरवृद्धि परीक्षा वैशाख १५ र १६ गते सञ्चालन गर्ने तयारी भएको शिक्षा शाखा प्रमुख भट्टले बताए ।
आधारभूत तहको पढाईलाई व्यवस्थित बनाउन नगरपालिकाले यो बर्षदेखि कक्षा ५ को समेत नगरस्तरीय परीक्षा सञ्चालन गरेको थियो । कक्षा ५ को परीक्षामा ५४ विद्यालयको सहभागिता रहेको थियो । उक्त परीक्षाको समेत परीक्षाफल प्रकाशन गरिसकिएको शिक्षा शाखा प्रमुख भट्टले बताए ।
