बैतडी –सुदूरपश्चिमकी सामाजिक विकास विकास राज्य मन्त्री सरस्वती खड्काले जनप्रतिनिधि र कर्मचारीबीच तालमेल हुनु आवश्यक रहेको बताएकी छन् । 

बुधबार जिल्ला समन्वय समिति बैतडीमा आयोजना भएको सुरक्षित आप्रवसान सम्बन्धी कार्यक्रममा बोल्दै उनले जनप्रतिनिधि र कर्मचारीहरुबीच तालमेल नहुँदा विभिन्न काममा बाधा पुगेको बताइन् । उनले भनिन् ,‘कर्मचारी र जनप्रतिनिधिहरुबीच तालमेल छ त ? यो बिषयमा हामीले अब बिश्लेषण गर्नुपर्ने बेला आएको छ ।’

राज्य मन्त्री खड्काले अहिले नकारात्मक कुरालाई मात्रै बढावा दिने काम भइरहेकाले यसले समाजमा समस्या निम्त्याएको बताइन् । केही भएको छैन् भन्ने भाष्य निर्माण गरेर गलत कुराको प्रचारप्रसार भएरहेको उनले बताइन् ।

पछिल्लो समयमा केही भएको छैन् भन्ने नकारात्मक प्रचारले युवाहरुमा समेत समस्या ल्याएको उनले सुनाइन् । उनले भनिन् ‘केही समस्या हामीहरुबीचमा पनि छ । तर केही नभएको होइन् । हिजोको तुलनामा आज धेरै कुरामा परिवर्तन भएको छ । तर नागरिकको अपेक्षा अनुसार हुन सकेको छैन् । यो तर्फ हामी सबैले सचेत हुनुपर्ने आवश्यकता छ ।’

अहिलेको युवा पुस्तालाई ध्यानमा राखेर तिनै तहका सरकारले कार्यक्रम र बजेट ल्याउनुपर्ने बताउँदै राज्यमन्त्री खड्काले युवा पुस्ताले पनि नवीनतम् सोचका साथ अगाडि बढ्नुपर्नेमा जोड दिइन् । 

एक अर्को प्रसंगमा उनले जिल्ला अस्पताल बैतडीलाई ५० शैय्याको अस्पतालमा स्तरोन्नती गर्नका लागि आफूले पहल गर्ने बताइन् । यसका लागि सबै तहबाट दबाब सिर्जना गर्नुपर्नेमा उनले जोड दिइन् । 

यस्तै विकास निर्माणका सन्दर्भमा आफ्नो मन्त्रालयबाट हुन सक्ने सबै कामलाई प्रभावकारी बनाउने समेत उनले बताइन् । 

स्थानीय सेवा सञ्चालन ऐन ल्याउनका लागि प्रदेश सरकारले पहल गरिरहेको बताउँदै यो ऐन चाँडै आउनेमा आफू आशावादी रहेको बताइन् । 

कार्यक्रममा दशरथचन्द नगरपालिकाका प्रमुख पुष्करराज जोशी (लख्खाभाइ)ले स्थानीय सेवा सञ्चालन ऐन नआउँदा स्थानीय तहहरुमा काम गर्न समस्या भएको बताए । यस्तै जिल्ला अस्पताल बैतडीलाई ५० शैय्याको अस्पताल बनाउनुपर्नेमा उनले जोड दिए । जिल्ला अस्पतालाई ५० शैय्याको अस्पताल बनाएमा बिएस्सी नर्सिङ पढाईका लागि बैतडीका स्थानीय तहहरुले पहल गर्ने उनले बताए । 

यस्तै सुर्नया गाउँपालिकाका अध्यक्ष अम्मरबहादुर कुँवरले बोलेका कुरा कार्यान्वयन गर्नेतर्फ सबैले ध्यान दिनुपर्नेमा उनले जोड दिए । 

सुरक्षित आप्रवासन सम्बन्धी कार्यक्रममा बैतडीका १० ओटै स्थानीय तहका जनप्रतिनिधि, प्रमुख प्रशासकीय अधिकृत, रोजगार सेवा केन्द्रका प्रमुख लगायत अन्य सरोकारवालाहरुको सहभागिता रहेको थियो ।