बैतडी –बैतडीको सुर्नया गाउँपालिका –७ स्थित शिखरपुर स्वास्थ्यचौकीको भवन जोखिममा परेको छ । जमीन भासिएपछि स्वास्थ्यचौकी भवन भत्कने जोखिम बढेको स्वास्थ्यचौकी प्रमुख बीरबहादुर बोहराले बताए ।
चार बर्ष अघिमात्रै १ करोड ८४ लाखको लागतमा निर्माण गरिएको स्वास्थ्यचौकीको भवन रहेको जमीन भासिएपछि भवन भत्किने जोखिम बढेको हो ।
गएको भदौमा बर्षाका कारण जमीन भासिएपछि स्वास्थ्यचौकी भवन जोखिममा परेको हो । कर्मचारी आवासहितको उक्त भवनको फाउण्डेसनमा चिरा परेपछि भवन भत्कने सम्भावना बढेको बोहराले बताए ।
भवन रहेको जमीन भासिएपछि तत्काल मर्मत सम्भारका लागि वडा कार्यालयमार्फत गाउँपालिकालाई जानकारी गराउँदा समेत केही पहल नभएको बोहराले गुनासो गरे । अब फेरि बर्षातको सिजन शुरु हुने बेला भएकाले भवन भत्कने जोखिम बढ्दै गएको उनले बताए ।
स्वास्थ्यचौकी भवन तलतिर जमीनपनि भासिएको स्वास्थ्यचौकी प्रमुख बोहराले बताए । १२ कोठे नयाँ भवनमा जमीन भासिएर चिरा परेपछि स्वास्थ्य सेवा प्रदान गर्न समेत समस्या भइरहेको छ ।
भासिएको भवन मर्मतका लागि वडा र गाउँपालिकाले समयमै ध्यान दिन नसके ठूलो क्षति हुन सक्ने बोहराले बताए । चालु आर्थिक बर्षमा भवन मर्मतका लागि बजेट विनियोजन हुने आशा भएपनि बजेट विनियोजित नभएपछि यो बर्ष भवन मर्मत नहुने भएको छ ।
बर्षा अघि नै भवन मर्मतको काम गर्न नसके भवनमा ठूलो क्षति हुन सक्ने बोहराले बताए ।
