बैतडी–बैतडीको सुर्नया गाउँपालिकाले दश बर्षे शिक्षा क्षेत्र योजना निर्माण गरेको छ । 

युनिसेफ नेपालको आर्थिक सहयोग र सामुदायिक विकास केन्द्र डोटीको प्राविधिक सहयोगमा गाउँपालिकाले योजना निर्माण गरेको सुर्नया गाउँपालिकाका शिक्षा शाखा प्रमुख टंकप्रसाद अवस्थीले बताए । 

गाउँपालिका भित्रका शिक्षा क्षेत्रमा देखिएका समस्याहरुलाई समाधान गर्ने हिसाबले योजना निर्माण गरिएको शिक्षा शाखा प्रमुख अवस्थीले बताए । 

योजनामा शिक्षा क्षेत्रका लागि दुरदृष्टि, लक्ष्य, रणनीति र कार्यनीति निर्धारण गरिएको योजना निर्माण सहयोग गरेको संस्था सामुदायिक विकास केन्द्र डोटीका शिक्षा अधिकृत पदम रोकायाले बताए । उनले भने,‘यो योजनाले शिक्षा क्षेत्र सुधारका लागि पहल गर्नेछ । यसमा शिक्षा क्षेत्रमा देखिएका समस्याहरुको विश्लेषण गरि समाधानका लागि आवश्यक उपाय समेटिएका छन् ।’

शिक्षा क्षेत्र योजनामा पालिकाको क्षेत्राधिकारभित्र रहेको बालविकास शिक्षा, आधारभूत शिक्षा, माध्यमिक शिक्षा र अनौपचारिक तथा निरन्तर सिकाइका कुराहरु समेटिएका सामुदायिक विकास केन्द्र डोटीका शिक्षा अधिकृत पद्मा खत्रीले बताइन् । 

योजना निर्माणका लागि सरोकारवालाहरुसंग अभिमुखीकरण गोष्ठी सम्पन्न गर्दैै योजना निर्माण कार्यदल निर्माण गरिएको थियो । उक्त कार्यदलले तथ्यांकहरु बिश्लेषण गर्दै योजना निर्माण गरेको शिक्षा शाखा प्रमुख अवस्थीले बताए ।
जनप्रतिनिधि, विद्यालयका प्रधानाध्यापक, शिक्षक र शिक्षा क्षेत्रका सरोकारवालाहरुको प्रत्यक्ष सहभागितामा योजना निर्माण गरिएको अवस्थीले बताए । उनले भने,‘हामीले योजना निर्माण गरेका छौं । यसले हाम्रो शिक्षा क्षेत्र सुधारमा सहयोग पुग्ने हाम्रो अपेक्षा रहेको छ ।’

शिक्षा क्षेत्र योजनाले पालिकाभित्रको समग्र शिक्षाको अवस्था सुधारमा सहयोग पुग्ने योजना निर्माण कार्यदलका सदस्य एवं शंकर संस्कृत मावि मूलखटालीका प्रधानाध्यापक रामबहादुर बिष्टले बताए । 

योजना निर्माणले शिक्षा क्षेत्रमा देखिएका समस्या र चुनौती सम्बोधनका लागि सहज हुने सुर्नया गाउँपालिका–४ का अध्यक्ष प्रताप महराले बताए । 

बैतडीका स्थानीय तहमध्ये १० बर्षे शिक्षा क्षेत्र योजना निर्माण गर्ने सुर्नया गाउँपालिका पहिलो भएको शिक्षा अधिकृत रोकायाले बताए । जिल्लाका दोगडाकेदार, डिलाशैनी र पुर्चौंडीमा पनि योजना निर्माणका लागि काम भइरहेको उनले बताए । 
सुर्नया गाउँपालिकाले शिक्षा क्षेत्र योजना निर्माण गरेको र यसले शिक्षा क्षेत्र सुधारका लागि सहयोग पुग्ने गाउँपालिका अध्यक्ष अम्मरबहादुर कुँवरले विश्वास व्यक्त गरे । सामुदायिक विद्यालयहरुको शैक्षिक गुणस्तर सुधारका लागि गाउँपालिकाले पहल गरिरहेको बताउँदै उनले योजना निर्माणले शिक्षा क्षेत्र सुधारमा एक इँटा थपिएको बताए । 

सुर्नया गाउँपालिकामा ३९ ओटा सामुदायिक विद्यालयहरु रहेका छन् । ती मध्ये १३ ओटा माध्यमिक तह र २६ ओटा आधारभूत तहका विद्यालय रहेका छन् । शिक्षा क्षेत्रमा गुणस्तर नभएको भन्ने जनगुनासो आइरहेका बेला शिक्षा क्षेत्र योजनाले गुणस्तर सुधारका लागि सहयोग पुग्ने विश्वास गरिएको छ ।