बैतडी–कोरोनाका कारण मृत्यु भएका बैतडीका युवकको सम्पर्कमा रहेका १७ जना मध्ये १४ जनामा कोरोना पुष्टि भएको छ । बैतडीको दशरथचन्द नगरपालिका ९ ग्वाल्लेकका ३३ बर्षीय पुरुषको कोरोना कारण यही वैशाख १४ गते डडेल्धुरा अस्पतालमा उपचारका क्रममा मृत्यु भएको थियो ।
मृतकको सम्पर्कमा रहेका १७ जनाको स्वाब संकलन गरी कोरोना परीक्षण गर्दा १४ जनामा कोरोना पुष्टि भएको स्वास्थ्य कार्यालयका प्रमुख योगेशप्रसाद भट्टले जानकारी दिए । संक्रमितको मृत्युभएपछि सम्पर्कमा रहेकाहरुको स्वाब परीक्षण गर्दा १४ जनामा संक्रमण पुष्टि भएको हो ।
संक्रमण पुष्टि भएकाहरु घरमै होम आइसोलेसनमा रहेका स्वास्थ्य प्रमुख भट्टले जानकारी दिए । पछिल्लो समय गाउँगाउँमा कोरोनाको संक्रमण फैलिसकेकाले स्वास्थ्यका मापदण्ड अनिवार्य पालना गर्न उहाँले आग्रह समेत गरे । उनले भने ‘कोरोनाको संक्रमण तीव्र गतिमा फैलिरहेको छ । स्वास्थ्यका मापदण्ड पूर्ण रुपमा पालना गरौं । स्वास्थ्यका मापदण्ड पालना नगरेमा भयावह स्थिती आउन सक्छ ।’
