बैतडी–लामो समयदेखि पेन्टिङ नगरिएको बैतडीको दशरथचन्द नगरपालिका १ मुस्याचोरस्थित गुरुखोला प्रहरीचौकीको भवनमा पेन्टिङ गरिएको छ । २०६६ सालमा चुनामात्र लगाइएको सो भवनमा यो बर्ष रंग लगाएको प्रहरीचौकीका प्रमुख प्रहरी सहायक निरीक्षक शंकर भण्डारीले बताए । उनले भने ‘मैले आएदेखि प्रहरीचौकी भवन मर्मत सम्भार गर्न पाए हुन्थ्यो जस्तो लागिरहेको थियो । स्थानीय निर्माण व्यवसायीको सहयोगमा यो कार्य सम्पन्न भएको छ ।’
स्थानीय निर्माण व्यवसायी पूर्ण टेरले रंग खरीदमा सहयोग गरेपछि प्रहरीचौकी भवनमा रंग लगाइएको हो । प्रहरीचौकी भवनमा रंग लगाएपछि राम्रो देखिएको प्रहरी सहायक निरीक्षक भण्डारीले बताए । भवनको मर्मत सम्भारका लागि चौकीसंग त्यस्तो बजेट नभएको हुनाले स्थानीय निर्माण व्यवसायीको सहयोगमा रंग लगाइएको जनाइएको छ । उनले भने ‘पेन्ट्स खरीदका लागि सहयोग पाएपछि हामीहरु सबै मिलेर भवनमा रंगरोगन गरेका हौं ।’
