बैतडी–सुदूरपश्चिम प्रदेश लोकसेवा आयोगले गएको साउनमा स्थानीय तहहरुलाई रिक्त दरबन्दीको विवरण बुझाउन आग्रह गरेको भएपनि धेरै जसो स्थानीय तहहरुले अझै विवरण बुझाएका छैनन् । प्रदेशका ८८ स्थानीय तहमध्ये अझै ३८ स्थानीय तहहरुले रिक्त दरबन्दीको विवरण नबुझाएको प्रदेश लोक सेवा आयोगका सचिव दुर्गादत्त बिष्टले बताए ।
बैतडीका चारओटा स्थानीय तहहरुले अझै पनि आयोगलाई रिक्त दरबन्दीको विवरण नबुझाएका पाइएको छ । जिल्लाको मेलौली नगरपालिका, डिलाशैनी गाउँपालिका, शिवनाथ गाउँपालिका र दोगडाकेदार गाउँपालिकाले रिक्त दरबन्दीको विवरण नपठाएका हुन् ।
सुदूरपश्चिम प्रदेश लोक सेवा आयोगले स्थानीय तहहरुलाई विवरण बुझाउन ताकेता गरिरहेको सचिव बिष्टले बताए । उनले भने ‘तहहरुले समयमा विवरण नपठाउँदा आयोगलाई विज्ञापन आह्वान गर्न समस्या भईरहेको छ ।’
स्थानीय तहहरुले करारमा कर्मचारी भर्ना गरेको हुनाले पनि विवरण नपठाएको हुन सक्ने अनुमान गरिएको छ । तर आयोगले रिक्त दरबन्दी र करारमा रहेकाहरुलाई समेत रिक्त मानेर विवरण पठाउन आग्रह गरेको छ ।
सुदूरपश्चिम लोक सेवा आयोगले पाठ्यक्रम निर्माणको काम अन्तिम चरणमा पुर्याईसकेकाले विवरण प्राप्त भएमा विज्ञापन आह्वान गर्न तयार रहेको जनाएको छ ।
कतिपय ठाउँबाट स्थानीय तहहरुले दरबन्दी लुकाएको भन्ने गुनासो समेत आईरहेको सचिव बिष्टले बताए । उनले भने ‘धेरै ठाउँमा विज्ञापन लुकाएको भन्ने गुनासो पनि आईरहेको छ । यस्तो भेटिएमा प्रदेश लोकसेवा आयोग ऐन अनुसार कार्यालय प्रमुखलाई विभागीय कारवाही हुन्छ ।’
