बैतडी –नेपाली कांग्रेस बैतडीका उपसभापति चतुरबहादुर चन्दको सामाजिक सञ्जाल मार्फत चरित्र हत्या गरिएको भन्दै नेपाली कांग्रेस बैतडीले विज्ञप्ती जारी गरेको छ । नेपाली कांग्रेस बैतडी नामक फेसबुक आइडीबाट उपसभापति चन्दको चरित्र हत्या गर्ने किसिमका पोष्ट भईरहेकाले कारवाहीको माग गरिएको विज्ञप्तीमा उल्लेख गरिएको छ ।  

नेपाली कांग्रेस बैतडीका सभापति नरेन्द्रसिंह थापाद्वारा हस्ताक्षरित विज्ञप्तीमा सामाजिक सञ्जालमा आएका अनर्गल र झुटा प्रचारका पछि नलाग्न आग्रह गरिएको छ । अनधिकृत रुपमा सो कार्यमा संलग्न व्यक्तिको खोजी गरी कारवाहीका लागि सम्बन्धित निकायसंग नेपाली कांग्रेसले प्रक्रिया अघि बढाईसकेको समेत विज्ञप्तीमा उल्लेख गरिएको छ । 

नेपाली कांग्रेसको १४ औं महाधिवेशन नजिक आएपछि एक पक्षले अर्को पक्षलाई विभिन्न लाञ्छना र आरोप लगाउन थालेका छन् । उपसभापति चन्दको नेतृत्वमा आगामी महाधिवेशनमा टीम घोषणा भएर प्रचारप्रसार जारी रहेको छ । यस्तै पूर्व सभापति शिवराज भट्टको नेतृत्वमा पनि टीम घोषणा भएर प्रचारप्रसार जारी रहेको छ ।