बैतडी –बैतडीको ढुंगाडबासीले सेती नदीमा पक्की तटबन्ध लगाउन माग गरेका छन् । सेती नदीले बेलाबेलामा दुख दिने गरेकाले त्यसबाट मुक्ति पाउनका लागि पक्की तटबन्धको माग गरिएको स्थानीय नरेन्द्र रोकायाले बताए । 

कार्तिक पहिलो साता परेको बेमौसमी बर्षाले ढुंगाडका स्थानीयहरुको खेत बगाएर बगरमा परिणत गरेको छ । केही बर्ष पहिला पनि सेती नदीको बाढीले स्थानीयहरुको घर खेत बगाएकाले पक्की तटबन्ध निर्माण गरिनुपर्ने माग गरिएको स्थानीय पदम साउँदले जानकारी दिए । उनले भने ‘सेती नदीमा पक्की तटबन्ध लगाउनुको विकल्प छैन् । के बस्ती स्थानान्तरण गर्नुपर्छ । नत्र तटबन्धको व्यवस्था नभए सेतीले ठूलो क्षति निम्त्याउन सक्छ ।’

सेती नदीमा तटबन्ध लगाउन नसके अब बस्ती नै जोखिममा रहेकाले तटबन्ध लगाउनु आवश्यक रहेको स्थानीय राजेन्द्र चन्दले जानकारी दिए । सेती नदीले बर्षेनी दुख दिँदै आएकाले यसको समाधानका लागि तटबन्ध लगाउनुपर्ने आफूहरुको माग रहेको स्थानीय ईश्वर साउँदले बताए । उनले भने ‘बाढी प्रभावित क्षेत्रमा पुगेका सबैसंग आफूहरुले बस्ती स्थानान्तरण अथवा पक्की तटबन्ध हुनुपर्ने माग गरेका छौं । तटबन्ध लगाइएन भने बस्ती नै जोखिममा छ ।’

बैतडीको बाढी प्रभावित क्षेत्रमा प्रधानमन्त्री, गृहमन्त्री, सांसद र स्थानीय राजनैतिक दलका प्रतिनिधिहरुले स्थलगत अवलोकन गरिसकेकाले सबैसंग आफूहरुले तटबन्धको माग राखेको स्थानीयहरुको भनाई छ । 

ढुंगाड क्षेत्रमा सेती नदीले बर्षेनी क्षति पुर्याउँदै आएकाले आफूले पनि संघीय सरकारसंग बस्ती स्थानान्तरण अथवा पक्की तटबन्धको माग गरेको सिगास गाउँपालिकाका अध्यक्ष हरिसिंह धामीले जानकारी दिए । सेती नदीले प्रत्येक बर्ष जमीन कटान गर्दै गएको र अब बस्ती पनि जोखिममा परेकाले यो तर्फ ध्यान आग्रह गरिएको उनले बताए । 

सेती नदीमा पक्की तटबन्ध निर्माणका लागि पालिकाको बजेटले नभ्याउने भएकाले आफूहरुले प्रदेश तथा संघ सरकारको ध्यानाकर्षण गराएको धामीको भनाई छ ।