बैतडी –बैतडीमा ट्याक्टर दुर्घटना हुँदा चालक घाइते भएका छन् । मेलौली नगरपालिकाको सु.प.प्र.०२००१ द २५ नम्बरको ट्याक्टर शिवनाथ गाउँपालिका ६ ओइला भन्ने स्थानमा सोमबार साँझ साढेसात बजेतिर दुर्घटनामा परेको जिल्ला प्रहरी कार्यालय बैतडीका प्रवक्ता प्रहरी निरीक्षक दर्शन खड्काले बताए । 

पञ्चेश्वरको आम्चोरबाट मेलौली तर्फ आउँदै गरेको ट्याक्टर दुर्घटना हुँदा ट्याक्टर चालक मेलौलीका २२ बर्षीय विजयसिंह नायक घाइते भएका प्रवक्ता खड्काले बताए । ट्याक्टर सडकबाट ५० मिटर तल खसेको बताइएको छ । 

घाइतेको प्रहरीले उद्धार गरिसकेको र उपचारका लागि अस्पताल पठाउने तयारी भएको प्रवक्ता खड्काले बताए । ट्याक्टर दुर्घटनाको कारण भने खुल्न सकेको छैन् । बैतडीमा आइतबार मात्रै जिप दुर्घटना हुँदा ६ जनाको ज्यान गएको थियो ।