बैतडी– बैतडीमा एक पुरुष मृत अवस्थामा फेला परेका छन् । जिल्लाको सिगास गाउँपालिका वडा नम्बर ८ स्थित कालपोखरी भन्ने स्थानमा अन्दाजी ५० वर्षीय कटकसिँह बोहरा मृत फेला परेका प्रहरीले जनाएको छ । बोहराको शव आज दिउँसो ४ बजे फेला परेको जिल्ला प्रहरी कार्यालयका प्रवक्ता प्रहरी निरीक्षक दर्शन खड्काले बताए । 

सिगास गाउँपालिका ८ पुनै डुङरी घर भएका बोहरा यही मंसिर १३ गते कालपोखरी मेलाबाट हराएका थिए । खोजी गर्दै जाँदा आज उनको शव फेला परेको प्रहरीले जनाएको छ । 

यता बोहराका आफन्तले भने हत्याको आशंका गरेका छन् । उनीहरुले घटनाको छानबीन गर्न माग गरेका छन् । 

घटनाका बिषयमा थप अनुसन्धानका लागि इलाका प्रहरी कार्यालय पाटनबाट अनुसन्धान टोली खटिसकिएको प्रहरी प्रवक्ता खड्काले बताए । घटनाको थप अनुसन्धान भईरहेको उनले बताए ।