बैतडी –बैतडीमा कर्तव्य ज्यान मुद्दाको आरोपमा एकजना पक्राउ परेका छन् । जिल्लाको सिगास गाउँपालिका ७ का ३० बर्षीय रमेशसिंह ऐरलाई प्रहरीले पक्राउ गरेको हो । ऐरलाई सिगास गाउँपालिका ८ का ५५ बर्षीय कटक बोहराको हत्यामा संलग्न रहेको आरोपमा पक्राउ गरिएको इलाका प्रहरी कार्यालय पाटनका प्रमुख प्रहरी निरीक्षक राजेश शाहीले बताए । 

गएको मंसिर १३ गते राती कालपोखरी मन्दिरको जात्रामा गएका कटक बोहरा मंसिर १४ गते मृत फेला परेपछि प्रहरीले अनुसन्धान थालेको थियो । मृतक बोहराको शरीरमा घाउचोट देखिएकाले उनको हत्या भएको हुन सक्ने भन्दै आफन्तजनले प्रहरीमा निवेदन दिएका थिए । 

सोही बेलादेखि प्रहरीले सो घटनाको अनुसन्धान गरिरहेको र घटनामा संलग्न भएको आरोपमा ऐरलाई सोमबार साँझ पक्राउ गरिएको प्रहरी निरीक्षक शाहीले बताए । उनले भने ‘घटना भएको भोलीपल्टदेखि रमेशसिंह ऐर फरार रहेकाले हामीले आशंका गरेर अनुसन्धान अगाडि बढाएका थियौं । अनुसन्धान गर्दै जाँदा कटक बोहराको हत्यामा उनको संलग्नता हुन सक्ने हामीले शंका गरेका छौं । अहिले अनुसन्धानका लागि हिरासतमा राखेका छौं ।’

पक्राउ परेका ऐरले मंसिर १३ गते राती कटक बोहरासंग विवाद भएको र सो बेला कुटपीट गरेको प्रहरी समक्ष स्वीकार गरेका छन् । पक्राउ परेकामा ऐर माथि थप अनुसन्धान भईरहेको प्रहरीले जनाएको छ ।