नेपालगञ्ज- नेपालगञ्जमा राती सुतेको अवस्थामा निस्सासिएर एकै परिवारका चार जनाको मृत्यु भएको छ । नेपालगञ्जस्थित भेरी अस्पतालको कार्यालय सहयोगीको क्वाटरमा सुतेका ७ जनामध्ये ४ जना मृत भेटिएका हुन् । विहान अबेरसम्म पनि ढोका नखुलेपछि हेर्दा  ४ जना मृत भेटिएका हुन् ।
विगत तीन वर्षदेखि कार्यालय सहयोगीको रुपमा कार्यरत कालिकोट खाँडाचक्र नगरपालिका–६ का धनप्रसाद भट्टराईको परिवार सुतेकै अवस्थामा  कोठामा घटना भएको हो । 
घटनामा २३ वर्षीय भट्टराईसहित उनकी आमा ४५ वर्षकी कोकिला, ३ महिने छोरा इप्सन र २७ वर्षीया दिदी नन्दकलीको मृत्यु भएको हो । 
श्रीमती, भाइ र अर्का एक छोरा बेहोस अवस्थामा भेटिएको भेरी अस्पतालका प्रमुख डाक्टर वीरेन्द्रबहादुर चन्दले जानकारी दिए ।
  उहाँकाअनुसार उनीहरु कोठा तातो बनाउन कोइला बालेर सुतेको र त्यसैका कारण अक्सिजनको कमी भएर घटना भएको हो । बेहोस अवस्थाका तीनजनाको भेरी अस्पतालमै उपचार भइरहेको छ ।