बैतडी –बैतडीमा शुक्रबार थप ३० जनामा कोरोन पुष्टि भएको छ । जिल्लाका विभिन्न स्थानमा गरिएको एन्टीजेन परीक्षणमा थप ३० जनामा कोरोना पुष्टि भएको स्वास्थ्य कार्यालय बैतडीका श्रोत व्यक्ति चन्दन सुवेदीले बताए ।
आज कोरोना पुष्टि हुनेमा पाटन नगरपालिकाका ११ जना, पुर्चौंडी नगरपालिकाका ४ जना, शिवनाथ गाउँपालिकाका २ जना र दशरथचन्द नगरपालिकाका एकजना रहेका छन् । यस्तै जिल्ला बाहिरका ३० जनामा पनि आज संक्रमण पुष्टि भएको स्वास्थ्य कार्यालयले जनाएको छ ।
शुक्रबार थप ३० जनामा संक्रमण पुष्टि भएसंगै जिल्लामा सक्रिय संक्रमितको संख्या दुई सय नाघेको छ । अहिले जिल्लामा सक्रिय संक्रमितको संख्या २१२ पुगेको श्रोत व्यक्ति सुवेदीले बताए । कोरोनाको तेश्रो लहर आएपछि जिल्लामा पहिलो पटक सक्रिय संक्रमितको संख्या दुई सय नाघेको हो ।
सक्रिय संक्रमित मध्ये पाटन नगरपालिकामा ५३ जना, दशरथचन्द नगरपालिकामा ५० जना, मेलौली नगरपालिकामा २५ जना र पुर्चौंडी नगरपालिकामा १६ जना रहेका छन् ।
यस्तै सिगास गाउँपालिकामा ८ जना, पञ्चेश्वर गाउँपालिकामा ५ जना, सुर्नया गाउँपालिकामा ३ जना, शिवनाथ र दोगडाकेदार गाउँपालिकामा २÷२ जना र डिलाशैनी गाउँपालिकामा एक जना सक्रिय संक्रमित रहेका छन् । बैतडीमा जिल्ला बाहिरका ४७ जना सक्रिय संक्रमित रहेका स्वास्थ्य कार्यालयले जनाएको छ । शुक्रबार जिल्लाभरी १६ जना संक्रमणमुक्त भएका छन् ।
