बैतडी –नेपाल मानव अधिकार एलाइन्स बैतडीले निर्वाचन आयोगले भने अनुसार स्थानीय तहको निर्वाचन हुनुपर्ने माग राख्दै सोमबार प्रधानमन्त्रीलाई ज्ञापन पत्र बुझाएको छ । स्थानीय तहका जनप्रतिनिधि रिक्त नहुने गरेर निर्वाचन ऐन अनुसार स्थानीय तहको निर्वाचनको मिति घोषणा हुनुपर्ने ज्ञापन पत्रमा उल्लेख गरिएको छ ।
जिल्ला प्रशासन कार्यालय मार्फत प्रधानमन्त्रीलाई पठाइएको ज्ञापन पत्रमा स्थानीय तह निर्वाचन २०७३ को व्यवस्था अनुसार निर्वाचन हुनुपर्ने माग गरिएको छ ।
एलाइन्सका जिल्ला अध्यक्ष नरेशकुमार पाण्डेय र केन्द्रिय सदस्य सरस्वती नेपालीद्वारा हस्ताक्षरित ज्ञापन पत्रमा आवधिक निर्वाचिन लोकतन्त्रको जग भएकाले निर्वाचन समयमै हुनुपर्ने उल्लेख गरिएको छ । मतदान गर्ने अधिकार नागरिकको अधिकार भएकाले त्यो अधिकारको रक्षा गर्न समेत ज्ञापनपत्रमा भनिएको छ ।
निर्वाचन आयोगले वैशाखमै स्थानीय तहको निर्वाचनका लागि सरकारको ध्यानाकर्षण गराएको भएपनि सरकारले अझै स्थानीय तह निर्वाचनको मिति तोकेको छैन् । यद्यपि सत्ता गठबन्धन भित्र आगामी जेठभित्रै स्थानीय तहको निर्वाचन सम्पन्न गर्ने सहमति भईसकेको छ ।
