दार्चुला –दार्चुलाको लेकम गाउँपालिकामा भाइरल ज्वरोको प्रकोप फैलिएको छ । गाउँपालिकाको सबैजसो वडाका विभिन्न गाउँमा मौसमी भाइरल ज्वरो फैलिएको छ ।ज्वरोले गाउँभरीका अधिकासं घरमा बिरामी परेको लेकम गाउँपालिका वडा नम्बर ५ मैखोलीका देबराज जोशीले बताए ।

मैखोली मात्र नभएर दार्चुलाका दर्जनौँ गाउँहरुमा भाइरल ज्वरोको संक्रमण देखिएको छ । एउटै घरमा दुई तीन जना समेत बिरामी परेका छन् । तीन हप्ता पहिले देखि फैलिएको भाइरल ज्वरोका कारण अधिकासं मानिसहरु बिरामी परेका छन् ।

शरीर दुख्ने, कडा ज्वरो आउने, टाउको दुख्ने, घाँटी दुख्ने, खाना निल्न कठिनाई हुने, बान्ता हुने लक्षण रहेको ज्वरोका बिरामी दैनिक रुपमा स्वास्थ्य संस्थाहरुमा समेत पुग्ने गरेको स्वास्थ्यकर्मी पुष्करराज जोशीले बताए । उनका अनुसार एक सय १ डिग्री भन्दा बढी ज्वरो आएका बिरामी अस्पताल पुग्ने गरेका छन् ।

अस्पतालको औषधीले ज्वरो कम भएपनि शरीर दुख्ने, टाउको दुख्ने र बान्ता हुने क्रम नरोकिएको बिरामीहरुले बताएका छन् । ज्वरोका कारण खाना खान मन नलाग्ने भएकोले बिरामी परेका मानिसहरु ज्वरो निकै भएपछि समेत निकै कमजोरी महसुस गरिरहेका छन् ।

स्वास्थ्य संस्थाहरुमा सबै प्रकारको औषधी समेत उपलब्ध नरहेको र कोरोना संक्रमणको डरले अस्पतालहरुमा जान समेत समस्या भइरहेको बिरामीहरुको गुनासो छ ।