रुपन्देहीमा मोटरसाइकल दुर्घटना हुँदा दुई जनाकाे ज्यान गयाे
रुपन्देही - रुपन्देहीको बुटवल उपमहानगरपालिका–१२ मिलनपार्कमा मोटरसाइकल दुर्घटना हुँदा दुई जनाको ज्यान गएकाे छ । एक जना घाइते भएका छन् ।
तीन जना चढेको लु ६० प ३६५२ नम्बरकाे मोटरसाइकल अनियन्त्रित भइ पर्खालमा ठोक्किँदा गैडहवा गाउँपालिका–९ हात्तीबजारका २० वर्षीय प्रेम रुचाल र २० वर्षीय राहुल थापाको ज्यान गएकाे हाे ।
प्रदेश ट्राफिक प्रहरी कार्यालय बुटवलका प्रवक्ता डीएसपी मोहन खाँडले दुवै जनाको उपचारका क्रममा बुटवलमा रहेकाे लुम्बिनी प्रादेशिक अस्पतालमा ज्यान गएकाे जानकारी दिनुभयाे ।
दुर्घटनामा गम्भीर घाइते भएका मोटरसाइकल चालक रुपन्देहीकै २१ वर्षीय विमल रानाको लुम्बिनी प्रादेशिक अस्पताल बुटवलमा उपचार भइरहेको छ ।
मोटरसाइकल अनियन्त्रित भएपछि सडकबाट ३० मिटर पर रहेको पर्खालमा ठोक्किएर दुर्घटना भएको प्रहरीले जनाएको छ ।
#उज्यालो#
प्रकाशित मिति: मंगलबार, फागुन ३, २०७८ ११:०२
प्रतिक्रिया दिनुहोस्
लोकप्रीय
