बैतडी –बैतडीको पाटन नगरपालिकाले ५ ओटा वडा कार्यालयमा नयाँ भवन निर्माण गरेको छ । नगरपालिकामा जनप्रतिनिधि आएको पहिलो पाँच बर्षे कार्यकालमा ५ ओटा वडा कार्यालयका भवन निर्माण भएका नगर प्रवक्ता लोकबहादुर भण्डारीले बताए ।
नगरपालिकाको वडा नं ३, ४, ७, ९ र १० मा वडा कार्यालयका नयाँ प्रशासकीय भवन निर्माण गरिएका हुन् । वडा कार्यालयका भवन नहुँदा समस्या भएका वडालाई प्राथमिकतामा राखेर भवन निर्माण गरिएको नगरप्रमुख केशवबहादुर चन्दले बताए ।
यस्तै वडा नं ५ को वडा कार्यालय भवन निर्माणका लागि ठेक्का सम्झौता भईसकेको नगर प्रवक्ता भण्डारीले बताए । नगरपालिकाले बजेट विनियोजन गरेर वडा कार्यालयका भवन निर्माण गरिएका उनले बताए ।
वडा कार्यालयका भवन निर्माण भएपछि कामकाजमा सजिलो भएको जनप्रतिनिधिहरुले बताएका छन् । वडा नं ९ मा भवन नहुँदा वडा नं ८ मा भाडामा भवन लिएर कार्यालय सञ्चालन गर्नुपरीरहेको थियो । अहिले वडा कार्यालयको भवन निर्माण भएपछि सजिलो भएको वडा अध्यक्ष लोकबहादुर भण्डारीले बताए ।
वडा कार्यालयका भवनहरु निर्माण भएपछि वडा कार्यालयहरुलाई सेवा प्रदानमा सहजता भएको नगरप्रमुख चन्दले बताए ।
