बैतडी – नेपाली कांग्रेसले बैतडीमा ‘घर–घरमा कांग्रेस, जन–जनमा कांग्रेस’अभियान सञ्चालन गर्ने भएको छ । आगामी चुनावलाई लक्षित गर्दै अभियान सञ्चालन गर्ने तयारी भएको नेपाली कांग्रेस बैतडीका सभापति चतुरबहादुर चन्दले बताए ।
जिल्लामा टोल समिति विस्तार अभियान जारी रहेको र अब घर घरमा पुग्ने अभियान शुरु हुने उनले बताए । उनले भने ‘हामीले पार्टीको जिल्ला कार्यसमितिको तेश्रो बैठकबाट घरघरमा कांग्रेस, जनजनमा कांग्रेस अभियान सञ्चालन गर्ने निर्णय गरिसकेका छौं । सोही निर्णय अनुसार पार्टीका नेता कार्यकर्ता सहित घरघरमा पुग्छौं ।’
यही फागुन २८ गतेदेखि एक महिना सम्म अभियान सञ्चालन गर्ने तयारी भएको नेपाली कांग्रेस बैतडीका सचिव प्रेमबहादुर चन्दले बताए । संगठन विस्तार र सुदृढीकरणका लागि अभियान सञ्चालन गर्ने तयारी भएको चन्दले बताए ।
नेपाली कांग्रेस सिद्धान्त, निती र विचारलाई आम मानिसमा पुर्याउनका लागि अभियान सञ्चालनको तयारी भएको नेपाली कांग्रेस बैतडीले जनाएको छ ।
आगामी निर्वाचनमा पार्टीलाई बहुमत दिलाउनका लागि प्रत्येक वडा, टोल र घरमा पुग्ने अभियान सञ्चालन गरिने सभापति चन्दले बताए । देशका ठूला परिवर्तन नेपाली कांग्रेसको नेतृत्वमा भएको र अब विकासको श्रृंखला पनि नेपाली कांग्रेसकै नेतृत्वमा जोड्नुपर्ने भएकाले अभियान सञ्चालनको तयारी भएको उनले बताए ।
जिल्ला कार्य समिति पार्टीका केन्द्रिय नेताहरुलाई बोलाएर विभिन्न ठाउँमा आमसभा गर्ने निर्णय समेत गरेको सभापति चन्दले बताए ।
