बैतडी –नेकपा एमालेका केन्द्रिय सदस्य लिलाधर भट्टले वर्तमान सरकार चुनावमा जान आलटाल गरिरहेको आरोप लगाएका छन् । एमालेले सोमबार डिलाशैनीमा आयोजना गरेको कार्यकर्ता प्रशिक्षण भेलालाई सम्बोधन गर्दै उनले स्थानीय चुनाव सार्न सरकारमा सहभागी दलले अर्लि इलेक्सनको कुरा उठाएको दाबी गरे । 

नेकपा एमालेले मात्रै देशलाई निकास दिन सक्ने भएकाले अबको चुनावमा एमालेलाई जिताउनुपर्नेमा उनले जोड दिए । 
डिलाशैनी गाउँपालिकामा आयोजना गरिएको कार्यकर्ता प्रशिक्षण कार्यक्रममा विभिन्न पार्टी परित्याग गरेर १८१ जनाले पार्टीमा प्रवेश गरेको एमालेका दशरथचन्द नगरकमिटि सचिव मनोज बोहराले बताए । 

कार्यकर्ता प्रशिक्षण भेलामा केन्द्रिय सदस्य भट्टका साथै एमालेका प्रदेश अध्यक्ष दामोदर भण्डारी, जिल्ला अध्यक्ष सुरेन्द्र पाल लगायतका नेता कार्यकर्ताहरुको सहभागिता रहेको थियो ।