बैतडी –बैतडीको दशरथचन्द नगरपालिकामा आजदेखि शुरु भएको पाचौं मेयरकप क्रिकेट प्रतियोगितामा दशरथचन्द नगरपालिका वडा नं ४ ले विजयी शुरुवात गरेको छ । दशरथचन्द नगरपालिका वडा नं ९ लाई २१ रनले पराजित गर्दै वडा नं ४ ले विजयी शुरुवात गरेको हो । 

टस जितेर ब्याटिङ गरेको दनपा ४ ले निर्धारित २० ओभरमा १७२ रन बनायो । उसका लागि प्रदीप चन्दले सर्वाधिक ६३ रन बनाए । 

१७३ रनको विजय लक्ष्यका साथ मैदान उत्रेको दशरथचन्द नगरपालिका वडा नं ९ ले १५१ रन मात्रै बनाउन सक्यो । वडा नं ९ का शेर चन्दले सर्वाधिक ४५ रन बनाएपनि हार टार्न सकेनन् ।

आजको खेलमा दनपा ४ का प्रदीप चन्द म्यान अफ दि म्याच घोषित भएका छन् । 

यसअघि प्रतियोगिताको एक समारोहका बीच नेपाल क्रिकेट संघ क्यानका अध्यक्ष चतुरबहादुर चन्दले उद्दघाटन गरे । उद्दघाटन समारोहमा दशरथचन्द नगरपालिकाका प्रमुख नरेन्द्रसिंह थापा, जिल्ला समन्वय समितिका प्रमुख सिद्धराज भट्ट, दशरथचन्द नगरपालिकाका उपप्रमुख मीना चन्द, बैतडी जिल्ला क्रिकेट संघका उपाध्यक्ष लोकराज जोशी लगायतको सहभागिता रहेको थियो । 

चैत २ गते सम्म हुने प्रतियोगिताको विजेता टोलीले नगद ७५ हजार सहित ट्रफी, मेडल र प्रमाणपत्र पाउने छ । यस्तै दोश्रो हुने टीमले नगद ५० हजार सहित ट्रफी, मेडल र प्रमाण पत्र पाउने छ । 

प्रतियोगितामा ११ टोलीको सहभागिता रहेको छ । नगर क्रिकेट समितिको आयोजनामा शुरु भएको प्रतियोगिता दशरथचन्द नगरपालिकाको सहयोगमा शुरु भएको हो । नगरपालिकाले प्रत्येक बर्ष मेयर कप पुरुष क्रिकेट प्रतियोगिता र उपमेयर कप महिला क्रिकेट प्रतियोगिताका लागि सहयोग गर्दै आईरहेको छ ।