बैतडी – नेपाली कांग्रेसका केन्द्रिय सदस्य यज्ञराज जोशीले देशको विकासका लागि कांग्रेसलाई जिताउनुपर्ने बताएका छन् । ‘घरघर जाऔं, कांग्रेस जिताऔं’अभियानका लागि केन्द्रिय प्रतिनिधिको रुपमा बैतडी पुगेका जोशीले कांग्रेसले मात्रै देशको विकास गर्ने बताए ।
नेपाली कांग्रेसको नेतृत्वमा मात्रै देशको विकास सम्भव रहेको जोशीको भनाई छ । जनताले दुई तिहाई मत दिँदा समेत कम्युनिष्टहरुले देश चलाउन नसकेको बताउँदै जोशीले अब कांग्रेसको पक्षमा मतदान गर्न आग्रह गरे ।
सगुनखबरसंग कुराकानी गर्दै केन्द्रिय सदस्य जोशीले ‘घरघर जाऔं, कांग्रेस जिताऔं’अभियानमा पनि यिनै कुरा राख्ने बताए । उनले भने ‘कम्युनिष्टले नेतृत्व गरेपछि देश कता गयो ? समीक्षा गर्ने बेला भएको छ । कम्युनिष्टहरु जनतालाई गरिब बनाएर शासन गर्न चहान्छन् । त्यसैले नागरिकलाई बलियो बनाउन कांग्रेसको जित आवश्यक छ ।’
नेपाली कांग्रेसले बैतडीमा डिलाशैनी गाउँपालिकाबाट अभियानको शुरुवात गर्ने नेपाली कांग्रेस बैतडीका सचिव देवराज जोशीले बताए । देशभर जस्तै बैतडीबाट पनि आइतबार दिउँसो १ बजे अभियानको उद्दघाटन हुने उनले बताए । अभियान अन्तर्गत १० ओटै पालिकामा र वडाहरुमा पुग्ने कार्यक्रम रहेको उनले बताए ।
