बैतडी –बैतडीको दशरथचन्द नगरपालिकामा जारी मेयर कप क्रिकेट प्रतियोगितामा सेमीफाइनल समीकरण पूरा भएको छ । दनपा ५ ले आज वडा नं ७ र ११ को टीमलाई हराउँदै सेमीफाइनलमा प्रवेश गरेको हो ।
यो संगै सेमीफाइनलमा पुग्ने अन्तिम चार टोलीको टुंगो लागेको छ । दनपा ४, दनपा ५, दनपा ६ र दनपा १० सेमीफाइनलमा प्रवेश गरेका प्रशिक्षक दिपेन्द्र बोहराले बताए ।
आज भएको पहिलो खेलमा दनपा ५ ले दनपा ७ लाई १२९ रनले पराजित गरेको छ । टस जितेर पहिले ब्याटिङ गरेको दनपा ५ ले १८.३ ओभरमा १९१ रन बनायो ।
१९२ रनको विजयी लक्ष्यका साथ मैदान उत्रेको दनपा ७ को टोली ७.५ ओभर खेल्दै ६२ रनमा अलआउट भयो । सो खेलमा दनपा ५ का जगदीश चन्द म्यान अफ दि म्याच घोषित भए ।
यस्तै आजै भएको दोश्रो खेलमा दनपा ५ ले दनपा ११ को टोलीलाई ७२ रनले पराजित गरेको छ । टस जितेर पहिला ब्याटिङ गरेको दनपा ५ ले १५७ रन बनायो । १५८ रनको विजयी लक्ष्यका साथ मैदान उत्रेको दनपा ११ को टोली १६.४ ओभर खेल्दै ८५ रनमा अलआउट भयो । सो खेलमा दनपा ५ का रुबी चन्द म्यान अफ दि म्याच घोषित भए ।
चैत २ गते सम्म हुने प्रतियोगितामा विजेता टोलीले नगद ७५ हजार सहित ट्रफी, मेडल र प्रमाणपत्र पाउने छ । यस्तै दोश्रो हुने टीमले नगद ५० हजार सहित ट्रफी, मेडल र प्रमाण पत्र पाउने छ ।
