कैलाली –नेपाली काँग्रेसकी केन्द्रीय सदस्य आरजु राणा देउवाले कैलालीबाट निर्वाचन लड्ने बताएकी छन् ।  बिहीबार धनगढीमा नेपाल प्रेस युनियन कैलालीले आयोजना गरेको पत्रकार सम्मेलनमा बोल्दै उनले माओवादी केन्द्र, एकीकृत समाजवादी लगायतका पार्टीसँग निर्वाचनमा गठबन्धन हुने र कैलाली क्षेत्र नम्बर ५ बाट आफू निर्वाचन लड्न तयार रहेको बताएकी हुन् । 

स्थानीय तहको निर्वाचनमा पनि काँग्रेसले अन्य पार्टीसँग तालमेलका लागि गृहकार्य थालेको उनले बताइन् । तोकिएकै समयमा स्थानीय तहको निर्वाचन हुने उनले बताइन् । 

आरजु राणा देउवा ०७४ को निर्वाचनमा कैलाली निर्वाचन क्षेत्र नम्बर ५ बाटै चुनाव लडेकी थिइन् । उनलाई बाम गठबन्धनका उम्मेदवार नारदमुनि रानाले पराजित गरेका थिए ।