बैतडी –बैतडीको मेलौलीमा आजदेखि दुई दिने कृषि प्रर्दशनी तथा सांस्कृतिक महोत्सव शुरु भएको छ । शिवनाथ कृषक सहकारी संस्थाको आयोजनामा महोत्सव शुरु भएको मेलौली नगरपालिका वडा नं ७ का अध्यक्ष एवं महोत्सव संयोजक राजेन्द्र कार्कीले बताए । 

स्थानीय संस्कृति र कृषि क्षेत्रको विकास गर्ने उद्देश्यका साथ महोत्सवको आयोजना गरिएको कार्कीले बताए । मेलौली नगरपालिका वडा नं ७ को कार्यालयको प्रांगणमा महोत्सव आयोजना गरिएको हो । 

महोत्सवमा भोजराज भट्ट, गोपाल दयाल, एलबी चन्द, पुष्पा बोहरा, जयराज भट्ट, झरना बोहरा, मनोहर परियार, प्राप्ति भट्ट लगायतका कलाकारहरुको सहभागिता रहेको छ । उनीहरुले आफ्ना प्रस्तुतीहरु महोत्सवमा राखिरहेका छन् । भोली सम्म सञ्चालन हुने महोत्सवले स्थानीय संस्कृतिको जगेर्नामा टेवा पुग्ने आयोजकले जनाएको छ । 

मेलौली नगरपालिका, शिवनाथ गाउँपालिका र पञ्चेश्वर गाउँपालिकाको आर्थिक सहयोगमा मणिलेक कृषि प्रदर्शनी तथा सांस्कृतिक महोत्सवको आयोजना गरिएको हो ।