बैतडी –नेपाली कांग्रेसका सुदूरपश्चिम प्रदेश सभापति बीरबहादुर बलायरले लोकतन्त्र बचाउन कांग्रेसलाई भोट दिनुपर्ने बताएका छन् । बैतडीको पाटनमा आइतबार आयोजित आमसभालाई सम्बोधन गर्दै सभापति बलायरले कांग्रेसले जितेमात्रै लोकतन्त्रको जित हुने बताए । उनले भने ‘देशमा लोकतान्त्रिक शक्ति भनेको कांग्रेस नै हो । त्यसैले आम मतदातालाई कांग्रेसमा भोट हाल्न आग्रह गर्दछु ।’
यसअघि चुनावी गठबन्धनको विपक्षमा रहेका बलायरले आज भने स्थानीय आवश्यकता अनुसार गठबन्धन गर्न सकिने बताएका छन् । सभालाई सम्बोधन गर्दै उनले नेपाली कांग्रेसको केन्द्रिय निर्णय आउन बाँकी रहेको र स्थानीय आवश्यकता अनुसार पार्टीहरुसंग गठबन्धन गर्न सकिने बताएको नेपाली कांग्रेस बैतडीका सचिव देवराज जोशीले बताए । कांग्रेसलाई जिताउन गाउँगाउँमा गएर माओल बनाउन पनि उनले कार्यकर्ताहरुलाई निर्देशन दिए ।
नेपाली कांग्रेस जिल्ला कार्यसमितिले आयोजना गरेको आमसभामा बोल्दै कांग्रेस बैतडीका सभापति चतुरबहादुर चन्दले स्थानीय तहको निर्वाचनमा कांग्रेसले बहुमत ल्याउने दाबी गरे ।
कांग्रेसलाई जिताउन उनले सबै मतदाता र कार्यकर्ताहरुलाई आग्रह समेत गरेका छन् ।
