बैतडी –सत्ता गठबन्धनका नेताहरुले आसन्न स्थानीय तहको निर्वाचनमा तालमेलका लागि छलफल गरिरहेका बेला पुर्चौंडीमा भने तालमेल नगर्न आग्रह गरिएको छ । नेपाली कांग्रेस पुर्चौंडी नगरकार्य समितिले बिहीबार एक विज्ञप्ती जारी गर्दै पुर्चौंडीमा कांग्रेस एक्लै चुनाव जित्न सक्षम रहेको जनाएको छ ।
पुर्चौंडी १० मध्ये ९ वडामा सर्वसम्मत वडा अध्यक्षका उम्मेद्वार र मेयर पदको उम्मेद्वार समेत टुंगो लगाईसकेकाले कुनै दलसंग चुनावी तालमेल नगर्न आग्रह गरिएको नेपाली कांग्रेस पुर्चौंडी नगरकार्यसमितिका सभापति गणेशबहादुर गडालले बताए ।
नेपाली कांग्रेसले पुर्चौंडीमा आफ्नै बलबुतामा चुनाव लड्ने योजना बनाएको सभापति गडालले बताए । पुर्चौंडीमा गठबन्धनको आवश्यकता नरहेको भन्दै जिल्ला कार्यसमिति, प्रदेश समिति र केन्द्रिय समितिको ध्यानाकर्षण गराएको कांग्रेसले जनाएको छ । यस्तै भातृसंस्था र शुभेच्छुक संस्थाहरुलाई कांग्रेसलाई जिताउन चुनावी तयारीमा लाग्न समेत विज्ञप्ती मार्फत आग्रह गरिएको छ ।
